Алдагъы гюнлерде Ботаюртну спорт къаласында СССР-ни спортуну устасы Мурат Сайитовну эсделигине авур атлетикадан республика турнири оьтгерилди. Бу йыл экинчилей юрюлеген шо турнирде бизин республиканы шагьарларындан ва юртларындан гелген 50-ден де артыкъ спортчу ортакъчылыкъ этди. Шоланы арасында ветеранлар да, къатын-къызлар да бар эди. Оьтгерилген турнирде авур атлетика булан машгъул болагъан ботаюртлу спортчулар айрыча команда къуруп ортакъчылыкъ этгенин де эсгермеге тюше.
Оьзюню эсделигине экинчилей турнир оьтгерилеген Мурат Сайитов СССР-ни ва гьар тюрлю халкъара ярышланы чемпиону болгъан, алдынлы ерлени алгъан. Бир вакътини ичинде Дагъыстанны авур атлетикагъа къарайгъан федерациясыны вице-президенти гьисапда спортну бу журасын бизин республикада оьсювюн болдурмакъ учун кёп чалышгъан.
Турнир ону булан бирче спорт булан машгъул болуп тургъан ёлдашларыны гьаракатыны яхшылыгъындан Дагъыстанны физкультурагъа ва спортгъа къарайгъан министерлигини ва авур атлетикагъа къарайгъан республика федерациясыны янындан оьтгерилеген ярышлагъа къошулгъан. Ярышланы оьтгеривню ва шону къурумчулукъ масъалаларын чечивню борчларын халкъара даражадагъы судья Хайрюдин Умаров, Дагъыстанны жыйым командасыны баш тренери Олхозур Элмурзаев, тренер Омар Назиров, Муратны атасы, республика оьлчевде де белгили спортчу Абдулкерим Сайитов бойнуна алгъан эди.
Ярышланы ачылывунда Ботаюртну администрациясыны башчысы Гьюсен Боташев, белгили спортчулар, тренерлер ва башгъа сыйлы къонакълар ортакъчылыкъ этди. Оьзлени сёйлевлери булан спортчуланы оьтгерилеген ярышларда уьст гелмек учун талпынмагъа ругьландырды.
Турнирде алдынлыкъ алгъанланы гьакъында айта туруп, спортчу къызланы арасында Хасавюрт шагьардан гелген И. Нюрмагьамматова, А. Байсолтанова, В. Байсолтанова, М. Баймуратова, С. Мирзабегова оьзлени айрыча бажарывлугъун гёрсетди. Ветеранланы арасында тогъатартгъан ботаюртлу Биймурат Гьажиев ва хасавюртлу Къайырбек Акаев эсли чагъына да къарамайлы, оьзлени гючюн-къуватын, шону булан бирге, авурлукъланы гётеривде бугюнлерде усталыгъын тас этмегенин исбатламагъа болду деп айтмагъа ярай. Эргишилени арасында И. Зайналов (Дербент район), М. Къайырбеков, М. Абдулшейхов, М. Элмурзаев, И. Муталипов (Хасавюрт), Р. Алханов (Эндирей), А. Къыявов (Къарабудагъгент), Н. Рабаданов ва М. Гьажимуратов (Магьачкъала) лап яхшы натижалагъа етишдилер.
Ярышланы барышында алдынлыкъ алгъанлар дипломлар, медаллар ва кубоклар булан савгъатланды. Ону оьзге ортакъчыларына, тренерлеге эсделик савгъатлар тапшурулду. Турнирде ортакъчылыкъ этгенлеге ва бары да гелгенлеге Абдулкерим Сайитов баракалла билдирди.
Н. Байболатов.
СУРАТДА: (алдагъы сыдырада солда) А. Сайитов, (онгда) Муратны тренери, СССР-ни дёрт керен чемпиону А. Авсетов турнирни алдынлылары булан.
