– Бирисигюн, 20-нчы мартда, бизин республикада кёп уллу маънасы булангъы агьвалат болду. Дагъыстанны Башчысы Владимир Васильев ДР-ни Халкъ Жыйынына Чакъырыв этди. Янгыз Халкъ Жыйынгъа тюгюл, савлай дагъыстан халкъына. Мен шо жыйында олтуруп ону сёйлевюне бек муштарлы кюйде тынгладым. Коррупциягъа, террорчулукъгъа къаршы ябушма чакъырыву кёплени рази этди.
Сонг да, Башчыбызны дагъыстан халкъланы яшавлукъ шартларын яхшылашдырмакъ учунгъу гьар тюрлю тармакъланы ёлбашчыларына бакъдырылгъан талаплары, республикада яшайгъан гьар агьлю, гьар авлет нечик яшайгъанны, не ишлейгенни, нечик ва къайда билим алагъанны тергевде сакълап, гьар не яндан да кёмек этме гереклигин тапшурагъаны, яшавлукъ уьйлер булан таъмин этме гереклигин борч этгени нечакъы да яхшы. Ёлбашчыланы гьалал кюйде, халкъ учун къуллукъ этме чакъыра туруп, пачалыкъ харжланы урлайгъанлагъа ёл берилмежекни, олайлар къатты кюйде такъсырланажакъны айтды. Янгы къайдада, халкъны пайдасы, республиканы оьсювю учун ишлемеге чакъырды. Шону англамайгъан ёлбашчылар тийишли такъсыргъа тарыжакъ деди.
Залда олтургъан бизге, айрокъда инчесаният тармакъны вакили магъа шолай чакъырывлар, яшавда болажакъ яхшы янгъа алмашынывлар, ол ёлбашчылагъа ойлашма, иш къайдаларын алышдырма береген заман, медицина, билим берив, спорт тармакъларда болажакъ алгъа барывлар бек кепиме гелди.
Озокъда, алда айтылгъан бары да тармакъларда масъалалар яшавгъа чыгъарыла, харж да табылажакъ. Маданиятны масъалалары буса – ягъада. Мен Башчыбыз булан нече керен де ёлукъгъанман, огъар язгъан кагъызлар да бар. «Лезгинка» ансамбль учун уьй къурма, филармонияны бинасын къурма, актёрлар учун айры уьй къурма сёз берилген эди. Мен де Башчыбыз айтгъан сонг шу масъалалар яшавгъа чыгъажакъ деп актёрлагъа да айтгъан эдим. Гьали оланы алдында ялгъанчыман. Оланы бетине нечик къарайым. Чакъырывда бизин тармакъгъа байлавлу гьеч сёз, гьеч харж гёрсетив ёкъ.
Уьлкени Президенти бу йылны Театрны йылы деп белгилеген. Бизин касбучуланы да яхшы янгъа алышынывлар болур деп кёп умуту бар эди. Биз шулай йылда да ягъадабыз. Не этме герек? Кимге арз этейик?
