– Дагъыстанны Башчысы оьзю­ню Чакъырыв кагъызын малим этген гюнмагъа Москвагъа сапар чыкъмагъа тюшдю. Тек не ёлну аваралары, не уьлкебизни тахшагьарында кютмеге тарыкълы ишлеримни кёплюгю болса да, оьзюм шо гюн юрегимден оьтгерип тынглагъан бизин республиканы Башчысыны сёйлевю эсимден таймай турду. Неге тюгюл, март айны 20-сында дагъыстан жамиятны алдына токъташгъан, оьзю айтагъан сёзге де, этеген ишине де бек жаваплы янашагъан, бир де болмагъан кюйде тындырыкълы кюйде кёп ойлашып, йыл боюнда къолда этилген уьстюнлюклени гьакъында алда токътагъан, артгъа салмай тюшеген масъалаланы гёз алгъа тутуп айтагъан республиканы Башчысы чыгъып сёйледи.

Владимир Абдуалиевич Чакъырыв кагъызны малим этегенде де Дагъыстанны халкъ хозяйствосуну гьар къайсы тармагъында да артгъа салмай чечмеге тюшеген масъалаланы билегенлигинден къайры да, ону айрыча гьар адамгъа, умуми кюйде алгъанда, билим берив, савлукъ сакълав тармакълагъа ва касбучуланы танглавгъа бакъгъан якъдагъы гьайлы янашыву гьис этилмей къалмай эди. Шо заманда жыйылгъанлар янгыз Дагъыстанны Башчысыны сёйлевюне тынглай эди буса да, ол малим этген Чакъырыв кагъызгъа, бир де къопдурувсуз кюйде, дагъыстан халкъы булан гьакъ юрекден юрютген лакъы­ры деп айтмагъа бажарыла.

Озокъда, бизин республиканы янгы ёлбашчылары тергев берип гелеген гьар къайсы тармакъда да бир тюрлю оьрлюклер эс этилмей къалмай. Тек шолар гьали де гёрмекли уьстюнлюк­леге айланып битмеген алгъа абат алывну белгиси десем, дурус болур. Шону Магьачкъалада яшайгъанлар да, Дербентде яшайгъанлар да, йыракъ Ботлихде ва Уллубийавулда яшай­гъанлар да эс этмей тюгюл. Мен биле бусам, бу йыл биринчилей болуп Чакъырыв кагъыз диаграммалар ва схемалар гёрсетиле туруп малим этилди. Шолар барысы да 25 бар эди. Шону булан бирге Чакъырыв кагъыз токъташдырылгъан къайдагъа гёре бир иш учун болмаса ярамайгъан кюйде тюгюл, гьар не ишге де оьрлюклеге талпындырагъан кюйде малим этилди.

Шо Чакъырыв кагъызда, бир тайпаланы йимик, мени де рази къалдырмайгъан ерлери де болду. Мен ойлашагъан кюйде, бизин республиканы ёлбашчыларына билим берив тармакъны – оьр охув ожакъларда билим беривню гьалына мекенли кюйде тергев бермеге тюше. Бу тармакъда чечилмеге тюшеген масъалалар кёп.