1918-нчи йылдан берли, 7-нчи ноябр Уллу Октябр социалист революцияны гюню деп белгилене эди. Пачалыкъ байрам гюн халкъны ишден эркин этеген кюйде 73 йыл юрюлдю. Шо гюн Москвада асгер парад да оьтгериле эди. Гьасили, 7-нчи ноябр Совет Союзу деген бизин уллу уьлкеде 1991-нчи йыл болгъунча байрам гюнлени инг де гёрмеклиси деп гьисап этилип турду. Буссагьатгъы вакъти 7-нчи ноябр Россияны асгер макътавлугъуну гюню деп де 1941-нчи йыл, Октябр революцияны гьюрметине оьтгерилген асгер парадны гюню деп санала.
Ноябр айны 4-нде белгиленеген байрам гюн 2005-нчи йылдан берли оьтгериле. Шо гюн 1612-нчи йыл Кузьма Мининни ва Дмитрий Пожарскийни ёлбашчылыгъы булан Москвада халкъ гётерилип, Польшаны елевчю армиясына къаршы тургъан ва шо ябушувда уьстюнлюк къазангъан.
Артындагъы йыл Москвада янгы орус пача белгиленген. Ол – Михаил Фёдорович, Романовланы тухумундан биринчи орус пача деп гьисаплана.
1618-нчи йыл Россия бютюнлей швед ва поляк асгерлеринден толу кюйде азат этилген.
4-нчю ноябрни Халкъ бирлигини гюню деп токъташдырмакъ учун Пачалыкъ Думада тавуш беривню заманында 327 депутат бу законну проектин якълагъан. КПРФ-ни бары да депутатлары шогъар къаршы чыкъгъан. Экевю буса тавуш бермеген. Энни 2004-нчю йылны 29-нчу декабринде Россияны Президенти Владимир Путин къол салгъан Указгъа гёре, 4-нчю ноябр Халкъ бирлигини гюню деп токъташдырылгъан. 7-нчи ноябр буса 2005-нчи йылны июль айыны 21-нде чыкъгъан федерал законгъа гёре, Эсделик тархны гюню, демек, 1917-нчи йылдагъы Октябр революцияны гюню деп белгилене.
Россия – оьзюню кёп миллетли маданияты ва къыйматлы ругь хазналары, халкъланы дослугъуну, бири-бирине гьюрмет булан янашывну гьакъыкъатлы мисаллары булан бай эл.
Халкъны бирлигини гюню уьлкебизни асрулар бою парахатлыкъда ва ярашывлукъда яшап гелген миллетлерини ортакъ къысматыны бир тархлы белгисидир.
Бу байрамны агьамияты гьакъда Дагъыстанны Башчысы алда айтгъан: «Бугюн бизин учун агьамиятлы борч – бизге къалгъан багьасы ёкъ варисликни бар этип сакъламакъ ва артдырмакъ, бизин уьлкени халкъларыны сыкълыгъын дагъы да беклешдире туруп, оьсювню ёлу булан алгъа юрюмек…», – деген калималар оьзлени маънасын гьали де тас этмеген.
Бугюнлерде 2005-нчи йылда арагъа чыкъгъан байрам гюн, Россияны тахшагьары Москвада йимик, оьзге регионларда да оьтгериле.
Максим Эсенбиев.
