Тюнегюн, май айны 23-нде, ДР-ни Халкъ Жыйыныны милли аралыкълагъа, жамият ва дин бирлешивлеге къарайгъан комитетине къуршалгъанлар пачалыкъ маълумат къуралларыны баш редакторлары булан ёлукъгъан.
Шо ёлугъувда республиканы парламентини оьрде эсгерилген комитетини ёлбашчысы Магьамматкъади Гьасанов булан бирге Дагъыстанны маълумат ва байлавлукъ министрини биринчи заместители Бадрутдин Магьамматов, ДР-ни журналистлерини союзуну председатели Али Камалов, олай да кёп оьзгелери ортакъчылыгъын болдургъан.
Эсгерилген ёлугъувну ортакъчылары инг алда милли газетлени редакцияларында болгъан ва артгъа салмай ярашдырмагъа, янгыртмагъа тюшеген Печатны уьюне къарап чыкъгъан. Шондан сонг олар пачалыкъ маълумат къураллары гьар гюнлюк чалышывунда къаршы болагъан четимликлени айланасында пикру алышдыргъан.
Ёлугъувну ортакъчылары эсгергени йимик, артдагъы йылларда милли тиллерде чыгъарылагъан газетлени тиражлары мекенли кюйде кемиген. Шону буса халкъны тюрлю-тюрлю къатлавлары электрон маълумат къуралларын кёп охуп иштагьланагъанлыгъы булан туврадан-тувра байлавлу экенин айрыча эсгермеге ярай. Шону булан бирге 1 миллиондан да артыкъ адам яшайгъан Магьачкъала йимик шагьарда газетлер сатылагъан киоскланы санаву бугюнлерде кёп аз экенлиги де шогъар таъсир этмейли къоймай.
Сонг да, гьакимлик къурумларыны вакиллери маълумат къуралларыны талапларын чечивге таман даражада янашмайгъанлыгъы да иш уьстде бир тюрлю четимликлени тувдура. Маълумат къуралларыны къуллукъчуларыны айлыкъ алапалары лап тёбен даражада къалып турагъанлыгъы да оланы ишге иштагьландырмай.
Ёлугъувда милли газетлени гьалына айрыча агьамият берилген. Баш редакторланы пикрусуна гёре тиллени айланасында тувулунгъан къувунлу шартланы гьисапгъа алып, милли тиллерде чыгъарылагъан газетлени сакъламагъа тюше. Шондан къайры да, милли тиллени сакълавгъа байлавлу пачалыкъны янындан янашывну да бюс-бютюнлей алышдырмаса, бирдокъда ярамай.
Ёлугъувну вакътисинде айтылынгъан бары да пикруланы жамлашдырып, оьзюню сёйлевюнде Магьамматкъади Гьасанов алда токътагъан масъалаланы чечмек учун тарыкълы таклифлени гьазир этмекни тийишли гёрегени гьакъда билдирген.
Бизин маълумат.
