Бугюнлерде бизин республиканы бары да билим берив ожакъларында айрыча жанланыв гьис этиле. Бирдагъы бир охув йыл тамамланып, уллу шагьарларда да, гиччи юртларда ва отарларда да школаланы тамамлап чыгъагъан яш уланлар ва къызлар учун ахырынчы зенг къагъыла.
Гьар йыл да мердешленип гелеген кюйде, шо шатлыкъларда орта школаны битдирип чыгъагъанлардан къайры да, он бир йылны боюнда олагъа мугькам билим ва тийишли тарбия бермекни къастын болдургъан муаллимлери, ата-анасы, гьакимлик къурумларыны вакиллери, олай да кёп санавдагъы оьзге къонакълар ортакъчылыкъ эте. Школа булан савболлашып, яшав ёлуна тюшеген яшланы атына алгъышлы, насигьатлы сёзлер булан бирге юрекде шатлыкъны ва пашманлыкъны гьислерин тувдурагъан макъамлар, йырлар чалына. Оьз гезигинде охувчу яшлар шиърулар охуй. Шолар барысы да дегенлей ахырынчы зенгге, яшлыкъгъа, гележекдеги умутлагъа, сююмлю муаллимлеге багъышлана. Он бир йылны узагъында оьзлени яннавурундан таймай юрюген муаллимлерине ва клас ёлбашчыларына баракалла билдире.
Умутлар дегенде де, бугюнлерде денгизлени уьстюнде къала къурмакъны къыйын гёрмейген уланланы ва къызланы шексиз кюйде гележек яшаву, дейгеним, юреги авгъан касбугъа ес болувгъа да, агьлю къурувгъа да байлавлу муратлары гьатсыз кёпдюр. Шоланы барысын да яшавгъа чыгъып гёрмеге олагъа насип болсун!
Дагъыстанны билим берив ва илму министерлиги, олай да бирикген пачалыкъ экзаменлени оьтгеривге къарайгъан центры малим этеген маълуматлагъа гёре буса, бизин республикада бу йыл школаланы битдирип чыгъагъанланы санаву 12 мингге етише. Биз де бу йыл школаланы тамамлап чыгъагъан уланланы ва къызланы бирдагъы да къутлап, олагъа ювукъда оьтгерилежек бирикген пачалыкъ экзаменлени оьр къыйматлагъа берип, юрегине тутгъан бары да муратлагъа етишмекни ёрайбыз. Школада алгъан билимлеригизни, муаллимлер, ата-аналар берген насигьатлагъа амин къалып, савлукъ булан санлы кюйде яшамакъны ёрайбыз!
