Хамаматюртлу агъа-ини АЛИМХАНОВЛАР башгъа ерлерде де оьзлени районундан кем танывлу тюгюллер.
Уллу Ватан давда олар барысы да болгъан. Биз буса шоланы гиччиси – Исакъ Алимхановну гьа­къында айтма сюебиз.
1941-нчи йылда, 20 йыл битгендокъ, Исакъны асгерге ча­къыра. Арадан кёп заман да гетмей, Уллу Ватан дав башлана. Ону Буйнакск шагьардагъы яяв асгер училищеге йибере. Младший лейтенант И.Алимханов 1942-нчи йылда Къырым ярыматавдагъы къыргъын давлагъа тюше. Яраланып къолай болгъанда, взводну командири Алимхановну янгы къурулгъан 255-нчи бригаданы денгиз пехотасыны 142-нчи батальонуна йибере. 1942-нчи йыл Туапсе шагьарны боюндагъы давларда бийикликни алагъанда автоматчиклени алдына тюшюп къоччакъ кюйде дав эте. Шо даву учун И.Алимханов Къызыл Юлдуз орден булан савгъатлана.
Къыйынлы давлар эте туруп, бригада алгъа юрюй, артда Молдавия, Украина ва Польша къала. Оьтген давларда гёрсетилген игитлиги учун Исакъ экинчилей де Къызыл Юлдуз орден булан савгъатлана.

1944-нчю йылда асгерлер сонг Пруссиягъа чыгъалар. Кенигсберг шагьарны немислер уллу бекликге айландыргъан. Старший лейтенант Исакъ Алимхановну взводуна аслу чапгъын башлангъанча, разведка этмек тапшурула. Савгъатлав кагъызында шо тапшурувну кютювде взводну командирини къоччакълыгъы гьакъда толу кюйде язылгъан.

«И.Алимхановну взводу тапшурувгъа йиберилгенде немислени уллу гючлерине къаршы бола, тек командири бюдюремей, яшыртгъынлап душманны артына чыгъа ва 25 немисни оьлтюре. Шолай да, 6 пулемётун ва бир пушкасын чыгъарып ала, 12 немисни есир эте. Яраланса да, дав майдандан гетмей. Взводну къоркъунчсуз дав этивю кёп адамны оьлюмден къутгъара ва аслу гючлеге алгъа чапма имканлыкъ бере». Шо игитлиги учун Исакъ Алимханов Александр Невскийни ордени булан савгъатлангъан. Шо савгъат айрыча игитлик гёрсетгенлеге берилегенни де эсгерейик.

Давдан сонггъу йылларда ол партия-совет ишлерде, сонг судья болуп ишлей. Агьлюсю Нисаханым булан 5 къызны тарбиялагъан.
Ол 1984-нчю йылда гечинген ва юрт къабурларда гёмюлген.

Камил Бамматович БАММАТОВ 1919-нчу йылда Капир-къумукъда тувгъан. Ол давгъа 1942-нчи йылда тюше ва шо йыл къурулгъан 31-нчи атышывчу дивизияны 818-нчи полкуну госпиталында младший асгер врач болуп къуллукъ этме башлай.
Сталинградны тюбюнден къувалангъан немислеге артгъа тартылма тюше, муна шо заманда 31-нчи дивизия фашистлени къабургъа боюндан чапгъын эте ва оланы яхшы савутлангъан 17-нчи армиясы булан тартышма тюше. Сонг бу дивизия Краснодар шагьарны азат эте. Шо бойдагъы давларда дивизияны 275 адамы оьле ва 501 адамы яралана.

Госпитальгъа гелеген яралыланы арты-алды болмай. Камил Бамматов яллыкъ не экенни билмей. Суткалар булан аякъ уьстде турма, гьатта дав майданда болма, шондан яралыланы чыгъарма тюше. Къызыл Юлдуз орденге гёрсетилген савгъатлав кагъызында 818-нчи полкну командири майор Селиванов шулай сёзлер язгъан:

«Бамматов К.Б – бек къоччакъ асгерчи, юрюлеген давлагъа къарамай, ол ал сыдыраларда бола, дав майданда солдатланы яраларын багъа. Ону асгердегилер кёп сюе ва абур эте. Артдагъы давда, 447 бийикликни якълайгъанда кёп солдат яраланды. Бамматов К. оьзюню инбашларына салып, къаны агъып битме турагъан 3 офицерни, 2 гиччи командирни ва 7 солдатны госпитальгъа гелтирди ва бары да кёмекни этди. Давгъа къуршалгъан чакъы заманны ичинде бажарывлу врач экенин де гёрсетди: ол 66 адамны оьлюмден къутгъарды. Бамматов К.Б. Къызыл Юлдуз орденге гёрсетиле».

Дивизия гьали Къыбла-Гюнбатыш фронтну гьисабында дав эте ва Днепр бойгъа етише. Сонг олар Днепропетровск областны алывда, Корсун-Шевченко, Уманск-Ботошанск, Ясск-Кишинёв гьаракатларда ортакъчылыкъ эте.

Польшаны азат этегенде де гече-гюн яллыкъ билмейген Камил Бамматов алда йимик ал сыдыраларда бола, яраланып гелгенлеге кёмек эте. Савгъатлав кагъызында ол Польшаны азат этив давларда 180 яралыгъа кёмек этгенни ва оланы бажарывлу бакъгъаны учун санитар ротаны командири капитан Камил Бамматов Ватан давну II даражалы орденине гёрсетилгени языла.
Давдан сонг да ол 1952-нчи йыллар болгъанча асгер къуллукъда тура ва полковник чинде отставкагъа чыгъа.

Ирбайхан Акаевич АКАЕВ 1918-нчи йылда Чагъаротарда тувгъан. Оьзюне 17 йыл болагъанда Хасавюртда школаны битдирген, шо йыл Госбанкны къуллукъчусу болуп ишлеме башлагъан. Артындагъы йыл ону Бабаюрт район Советни инструктору этип чыгъара. 1938-нчи йылны ахырында буса Къызыл Армияны сыдраларына чакъырыла.

1939-нчу йылда Ирбайхан гиччи командирлени курсларын бите ва 6-нчы кавалерия дивизияны 23-нчю кавалерия полкда взводну командири болуп белгилене.

Уллу Ватан давда Донской ва Экинчи Прибалтика фронтларда дав эте.

Биринчи савгъатын 1941-нчи йыл 17-нчи декабрде алгъан. Савгъатлав кагъызда язылгъан кюйде, взводну командири Акаев оьзюню взводу булан Алексеевка юртгъа гирген ва уьйлерде яшынгъан немислени гранаталар ташлап атылтгъан, командир 12 немисни оьлтюрген. Шо игитлиги учун И.Акаев Къызыл Юлдуз орден булан савгъатлана.

Давлар эте туруп, кавалерия полк Воронеж областны да немислерден азат эте. Оьтген заманны ичинде гёрсетилген игитлиги учун И.Акаев Ватан давну II даражалы ва бирдагъы керен де Къызыл Юлдуз орденлер булан савгъатлана.

1943-нчю йылны ноябр айында Ирбайхан Акаевни взводун немислер чапгъын этеген Третьяки деген бойгъа сала. Взводгъа къаршы немислени танклары да булангъы 2 батальону чапгъын эте. Взвод немислени 4 урушун гери ура ва 200 солдатын оьлтюрюп, оланы алгъа барма къоймай. Командирни игитлиги Дав Къызыл Байракъ орден булан къыйматлана.
Шо давда Ирбайхангъа авур яра тие, ол госпиталларда дав битгенче ята.

1945-нчи йыл уьйге къайта ва Хасавюрт райисполкомну ­инструктору бола, 4 йылдан буса председатели этилип белгилене. Гече-гюнюн бир этип ишлейген Ирбайханны дав савгъатларына Загьмат Къызыл Байракъ орден де къошула.
Ол тюрлю-тюрлю йылларда партияны Хасавюрт райкомуну 1-нчи секретары, промышленност ва транспорт къурумланы башчысы болуп ишлей.

И. Акаев совет ва партия къуллукъларда ишлегенден къайры да, Дагъыстанны обкомуну бюросуну члени ва Дагъыстанны Оьр Советини депутаты болуп да сайлана.

Ирбайханны аты Хасавюртдагъы уллу орамланы бирисине тагъылгъан.

Сагьадулла САГЬАДУЛЛАЕВ 1911-нчи йылда Буглен юртда тувгъан. Ерли колхозда ишлеп турагъанда армиягъа чакъырыла ва Новочеркаск шагьарда ерлешген кавалерия дивизиягъа йибериле. Эки йылын да битдирип, уьйге къайта. Дав башлангъанда ону фронтгъа йибере ва 320-нчы атышывчу дивизияны 476-нчы полкуну 66-нчы айры атлы разведка взводуна къоша.

Аслу гьалда ол Ростов областны Азов шагьары учун дав этегенде къоччакълыкъ гёрсетген. 1943-нчю йылны башында разведка взводгъа гечортадан сонг хапарсыздан немислер токътагъан юртгъа чапгъын этмек тапшурула. Шо юрт темир ёлну боюнда ерлешгенге ва шонда уллу станция бар экенге дав ишинде тарыкълы пункт деп гьисаплана. Чапгъынны гёзлемеген фашистлер эсер-месер болуп уяна, бирлерин гранаталар ташлап оьлтюре, шёшгелер булан да амал этелер.

Эс тапгъанда немислер миномётлардан ва пушкалардан атышма башлай, тек чапгъынны токътатма бажарылмай. Шо юртда 100-ден де къолай немис оьле ва 40-вун есир эте. Немислени 10 паровозу алына, 100-лер булангъы вагонларда дав савут ва ашамлыкъ маллар табыла, кёп санавдагъы автомашинлер де бизинкилени къолуна тюше.

Шонда гёрсетген игитлиги учун Сагьадулла Сагьадуллаев «Къоччакълыгъы учун» деген медаль булан савгъатлана. 320-нчы атышывчу дивизия Белоруссияны, Венгрияны, Австрияны азат этегенде ортакъчылыкъ эте. Не ерлерде дав этсе де, бизин къумукъ улан къоччакълыкъ гёрсетип тургъан.

Бессарабиядагъы давларда къоччакълыгъы учун Къызыл Юлдуз орден берилген Сагьадулланы взводуна Будапештни алагъанда: алда ерлешген госпитальны ичиндегилени къолгъа алмакъ тапшурула. Башында оьзю де булан взвод 2 пулемётну дагъыта, къаршылыкъ билдирген 45 немисни оьлтюре ва арасында 2 полковник ва офицерлер бар 148 немисни есир эте.

Сагьадулланы игитликлери Ватан давну II даражалы ордени булан ва кёп санавдагъы медаллар булан къыйматлана. Шо давда взводну командирини кёмекчиси старший сержант С.Сагьадуллаев авур яралана ва 1945-нчи йылны ноябр айы болгъанча госпитальда ята.

Къолай болгъанда ону уьйге йибере. Давдан сонггъу йылларда Сагьадулла Сагьадуллаев Магьачкъаладагъы дазу сакълавчуланы школасында инструктор болуп дарслар бере, сонг Каспийск шагьардагъы заводда ишлей.