Орамгъа давну ветераныны аты берилди

7 марта 2015 в 15:11 939
Прочту позже
Орамгъа давну ветераныны аты берилди


             Февраль айны ахырынчы гюнюнде Хасавюрт шагьарны Северный деген микрорайонуну бир орамына Уллу Ватан давну гьаракатчы ортакъчысы, жамият ва партия къуллукъларда кёп йыллар ишлеген Рашитбек Алимханович Алимхановну аты та­гъылды. Шогъар байлавлу оьтгерилген чарада ону булан бирге ишлеген, таныгъан ёлдашлары, дос-къардашы ортакъчылыкъ этди.

            Рашитбек Алимханов 1912-нчи йылда Бабаюрт ра­йонну Хамамат­юртунда тувгъан. Яшлайын загьматгъа къуршалгъан Рашитбек ерли школаны бите ва комсомол-партия ишлеге чыгъа. Уллу Ватан давда ол артиллерист бола ва давлар булан Сталинграддан Берлинге ерли бара. Давда гёрсетген къоччакълыгъы учун Къызыл Юлдуз ва Ватан давну II даражалы орденлери булан савгъатлана.

        – Рашитбек Алимханович гьар заманда да яшёрюмлени гьайын этип тургъан адам эди, ол мени де насигьатчым болду, – дей юрт хозяйство илмуланы доктору Алибек Гьажиев. – Ол оьзю пенсиягъа чыгъагъанда, оьзюню орнуна мени гёрсетди. Башлап мени партияны район комитетини 2-нчи секретары этилип, артда ону оьзюню орнуна салындым. Халкъны яшавун яхшылашдырмакъ учун къасткъылып ишледи. Рашитбек Алимхановични атын даимлешдирмек учун орамгъа ону атын къоймакъны бек арив гёрдюм.

          Шолай да, митингде Хасавюрт районну ич ишлер бёлюгюню ветеранларыны советини председатели А. Арзулумов, Бабаюрт район администрацияны башчысыны 1-нчи орунбасары А. Абсаламов, шагьар жыйынны депутаты А. Акъавов ва А. Къандавуров Р. Алимхановну гьа­къында исси сёзлер айтдылар.

           Дос-къардашыны атындан авлетини авлетлери Фарида ва Марат Алимхановлар жыйылгъанлагъа, шагьар жыйынны депутатларына баракалла билдирдилер.



Гебек КЪОНАКЪБИЕВ,

оьз мухбирибиз.