Бир гюн редакциягъа телефон сёйлеп, оьркъазанышлы муаллим Абдурагьим Мамаев: «Юртлум, Россияны игити Закир Давутовну гьакъында язып сизге кагъыз йибергенмен, шону печат этгенигизни сюер эдим», – деди. Мен алда да Закирни гьакъында биле эдим. Бу яш чагъында асгерде къуллукъ эте туруп, дав агьвалатларда ортакъчылыкъ этип, ата юртуна эсен-аман къайтма насип болмагъанын да биле эдим. Къоччакълыгъы учун берилген оьр ат да юртлулары учун, районлулар учун оьктемлик болдурагъан иш экенни де билип, о гьакъда мекенли айтмагъа умут булан Оьр Къазанышгъа барып, биринчилей Закир Давутовну гьакъында язгъан Абдурагьим булан ёлукъма алгъасадым.
Юртгъа гелгенде Абдурагьим къайда яшайгъанны ахтарып ва оьзге пикрулар да булан юрт администрацияда болдум ва кёп йылланы узагъында бу администрацияда тюрлю къуллукълар кюте гелеген Камалутдин булан ёлукъдум.
Камалутдин мени мурадымны эшитген сонг, бек муштарлы кюйде къуллукъ кютюлежекни англатды ва мен юртдан гетгинче къырыйымда турду.
Биринчилей, биз Абдурагьимни тапдыкъ, сонг Закир Давутов охугъан орта школагъа бардыкъ. Мен Закирни охутгъан муаллимлер булан лакъыр этегенде, яшлай дюньядан гетген уланны къысматы яш чагъында хапарсыздан уьзюлгени, озокъда, ойлашдырды. Болса да, йыллар оьте туруп, ону аты, гертиден де, оьктемлик тувдура гелегенине де инандым.
– Баш вакъти ата-анасы да, таныйгъанлар да бек къыйналдыкъ. Юртда бир-биревню яхшы таныйсан чы, – деп Абдурагьим бираз кюстюн болду. Сонг инбашларындан авур юкню тайдырып, заманлыкъгъа ерге салгъандай сесгенип, – Закирни къоччакъ иши – бары да юртлу жагьиллер учун да, яшлар учун да уьлгю, уллулар учун оьктемлик, – деди.
Россияны Игити Давут Закировну аты Оьр Къазанышдагъы эки номерли школагъа къоюлгъан. Юртда эки школа бар. Экисинде де гьар йыл ону эсделигине багъышланып патриот тарбия дарслар, спорт ярышлар, адабият ахшамлар оьтгериле, сурат альбомлар, видеороликлер гёрсетиле. Оланы барысында да Закирни анасы Гьайбат, атасы Али, къызардашы, агъасы, оьзге къардашлары, юртлулары да ортакъчылыкъ эте.
Оьр Къазаныш юртну ичинде, тёбечик ерде юртлулары Закир Давутовгъа салгъан эсделик таш да бар. Юртлулары ону атын унутмай, эсделик эстафетаны наслудан- наслугъа тапшурагъаны бек яхшы.
Закир оьзю булан армияда къуллукъ этеген яшлар булан алдына салынгъан борчну кютмек учун, 1999-нчу йылны декабр айыны 29-нда Мычыгъыш Республикада дав агьвалатларда ортакъчылыкъ эте туруп, Аргун къаяны тав бетлеринде боевиклер булан атышывлар юрютген. Шону натижасында яралангъанланы да алып, Закирни группасындагъы яшлар токътагъан ерин къоюп гетме борчлу болгъанлар. Ол буса ёлдашларыны артындан етишмесин деп, душманны ёлун къыркъып сакълама оьзюне борч алып артда къалгъан. Боевиклерден 3-сюн оьлтюрген сонг, оьзю де авур яралангъан ва шо ерде гечинген. 70-ге ювукъ савутлангъан адамлар булан, озокъда, Закирни группасына туврадан дав этме бажарылмай болгъан. Боевиклер авлакъны яхшы таныйгъанындан къайры да, шо мюгьлетде эки яны алаша булут басгъан вакъти болгъан.
…Закир Оьр Къазаныш юртну къабурларына гёмюлген. Эсделик белгиси де уллу ёлну къырыйында кимге де гёрюнюп турагъан бийиксув ерде ерлешген. Къырыйында Уллу Ватан давдан къайтмай къалгъан юртлулагъа салынгъан эсделик таш да бар.
Закир Давутов гёрсетген игитлик, огъар бираз сама тергев берип къарасанг, оьзюню яхшылыгъындан, рагьмулугъундан, ёлдашларын аяп амалгъа гелген. Балики, шо ерде оьзге командир болгъан эди буса, ким биле, солдатланы бирисине оьзю кютме бойнуна алгъан ишни тапшуруп, оьзгелер булан къачып гетме де болур эди. Закир буса командир гьисапда да шо ерде эргиши къылыкъ гёрсетген. Адамлыкъ янындан да ону даражасыны бийиклиги гёрюне.
Шо мюгьлетде, ойлашма чакъы заман ёкъ вакътиде, адамны ич дюньясыны гёрюнмей яшайгъан гючю де огъар кёмек эте деп айта. Бир янындан, ол шо къуллукъну оьзюм яхшы кютермен деп ойлашгъандыр. Олай ерде артда къалгъан адамдан кёп зат гьасил бола. Ону бажарывлугъу кёмек эте. Ёлдашларын сакълап, олардан артда къалып, атыша гелеген боевиклеге къаршы турмакъ учун къаркъарасы эр сангъа да гирип битмеген жагьил яшгъа уллу тавакаллыкъ, къоччакълыкъ, ёлдашларына аминлик тарыкъ. Таза къумукъ хасият. Ону яш наслугъа таъсирли гючю де кёп.
