13 октябр – Юртхозяйствону къуллукъчуларыны гюню


        Дагъыстан оьзтёрече табии шартлары ва ниъматлары оьсювге болушлукъ этеген аграр республика гьисапда савлай уьлкеге белгили. Артдагъы заманларда экономиканы аслу бутагъы болгъан юрт хозяйство тармакъны бир арада къолдан чыгъарылгъан имканлыкъларын янгыдан яшавгъа къайтармакъ мурат булан гёрюлеген чаралар да оьз натижаларын бермей къоймай десек, гьакъыкъатгъа къыйышмай къалмас.


«Агропромышленный тармакъны асувлулугъу» учун деген милли борчда белгиленген агьамиятлы тапшурувланы яшавгъа чыгъарывда пачалыкъны янындан этилеген кёмек де оьсюмлюкчюлюк ва гьайванчылыкъ тармакъларда чалышагъан адамланы ва бирлешген коллективлени, къурумланы иштагьландыра демеге ярай.


Шолайлыкъда, бизин республикабыз учун аслу гелимлер, бюджетлеге хайыр береген юзюмчюлюкню гьалы къолайлаша барагъаны айрыча тергевню тарта. Буссагьатгъы вакътиде бизин республикабызда юзюм борла оьсдюрюлеген майданланы умуми къадары 26 минг гектаргъа ювукълашгъан. Шону 20 минг гектардан къолай тарлаву толу тюшюм береген юзюмлюклер. Бу йыл юзюмлюклерден 180 минг тон тюшюм алмагъа умут этиле. Гьалиге ерли 170 минг тоннасы къайтарылгъан. Дагъы да 2 минг гектаргъа ювукъ майданда юзюмню геч бишеген жураларын къайтарыв давам этиле. Гюзде 500 гектаргъа янгы юзюмлюклер де салма хыял тутулгъан.


Язлыкъланы ва гюзлюклени чачывда да авлакъчылар загьмат тёгювню ва гьакъ тёлевню янгы асувлу къайдаларын ахтара ва танглай. Шолайлыкъда, гюзлюк ашлыкълардан, чалтикден, овощлардан алынагъан тюшюмлени сан ва санав яны арта бара. Гьайванчылыкъда, малчылыкъда, къушлар оьсдюрювде де бир къадар яхшы натижалар къолда этилген. Бугюн республикабызны юрт хозяйство тармагъыны къуллукъчуларыны аслу талабына гёре гьайванчылыкъда ва оьсюмлюкчюлюк тармакъда болдурула­гъан продукцияны ишлетмек, сакълавгъа салмакъ ва шолай да сатывгъа чыгъармакъ учун хас имаратлар къурув ва пайдаландырывгъа берив агьамиятлы борч болуп токътай.


Дагъысын айтмагъанда, бу йыл гюзлюклени 100 минг гектаргъа ва гелеген йыл язлыкъланы 200 минг гектардан къолай майданлагъа чачмагъа умут этиле. Шону булан янаша чалтик чачылагъан ва емиш бавлар салынагъан майданлар да арта­гъаны ачыкъдан гьис этилине. Шо да республикада янгы иш ерлени ва налогланы жыйымын артдырмагъа имканлыкълар ярата.


Шону гьисапгъа алып, бизге де бугюн республикабызны юрт хозяйство ва ишлетив промышленностуну къуллукъчуларына, оьзлени касбу байрамы булан къутлай туруп, янгыртывланы ёлунда гёрмекли уьстюнлюклер ёрамакъ къала.

Авторизация
*
*
Регистрация
*
*
*
Согласны с условиями сайта?
Генерация пароля