Октябрни 9-нда Дагъыстан Республиканы Халкъ Жыйыныны Председатели Хизри Шихсайитов Магьачкъаладагъы 8 номерли поликлиниканы коллективине янгы автомбилни ачгъычларын тапшурду. Бу савгъатны «Бирикген Россия» деген партияны члени республика парламентини депутаты Муслим Гиндиев берген.
Бу ишге багъышланып болгъан жыйында вице-спикер Елена Ельникова, савлукъ сакълавгъа ва социал политикагъа къарайгъан министрни заместители Висампаша Ханалиев ёлдашлар да ортакъчылыкъ этгенлер.
Депутатлар алданокъ поликлиниканы ичине къарап чыкъгъанлар, аврувлар ва медицина къуллукъчулар булан лакъырлашгъанлар.
Хизри Шихсайитов медицина къуллукъчуланы иш, туруш шартлары нечик экенни олагъа сорагъан. Аврувланы сёйлетип, олагъа мунда нечик къарайгъанны ахтаргъан. Адамланы гьеч арзы ёкъ экенге оьзю де рази болгъан. Эсгерилген поликлиника 70 мингден де къолай адамны аврувларын багъа. Мундагъы уьйлени генглешдирмеге тезокъ заман болгъан.
Башгъа янгы бинаны къурмагъа республиканы парламенти болушлукъ этежегине Хизри Шихсайитов врачланы коллективин инандыргъан.
Артда ол, поликлиниканы баш врачы Малик Азизовгъа LADA Granta машинни ачгъычларын бере туруп, Малик Гиндиев шабагьат этген бу автомобильни поликлиниканы коллективине де, уьзюрю болуп онда гелегенлеге де пайдасы тиер деп сёйледи.
Халкъ Жыйынны Председатели Хизри Шихсайитов сонг дагъы да Избербаш шагьарда къурулуп турагъан яшлар бавуна да барып къарагъан. Ону бу сапарында вице-спикер Елена Ельник, милли аралыкълагъа, жамият ва ругьани бирлешивлеге къарайгъан Комитетни председатели Магьамматкъади Гьасанов, Избербаш шагьарны баш гьакимини заместители Нариман Рабаданов узатдылар. Еринде депутатлар 100 яшгъа деп къурулагъан садикни ишленеген кююн гёрдюлер.
Х.Шихсайитов къурулушну юрютегенлер булан ишлени гьакъында лакъырлашды, оланы къыйын-тынчын оьзлеге сорагъан.
Мунда айтылгъангъа гёре, садикни бинасын бу йылны декабр айыны ахырына ишлеп битмеге гёз алгъа тутулгъан. Шо буса шагьарда школа чагъына етмеген яшланы сакълайгъан ожакъларда ерлер етишмейгенликни масъаласын чечмеге бир къадар кёмек этежек.
Хизри Шихсайитов бу объектни къурулушуна байлавлу масъалаланы гьаманлыкъ тергевню тюбюнде сакъламакъны депутатлагъа тапшургъан.
Бизин маълумат.
