«Йырлай Сайдулла Амирханов»
Шулай ат булан Хасавюртдагъы «Гарунов А.Р.» деген китап басмаханада шаир, композитор, йырав Сайдулла Амирхановну шиъру китабы чыкъгъан. Бу китапгъа авторну халкъарада белгили болгъан йырлары жыйылгъан.
С.Амирханов Хасавюрт районну Кёстек юртунда тувгъан. Ол оьзюне алты йыл болагъанда музыкалы алатланы сокъма башлагъан. Бу агьлюде къумукъ макъамланы, йырланы бек сюеген, оьзлер де тюрлю-тюрлю музыка алатланы уста кюйде согъуп болагъан адамлар болгъан. Агъач къомуз согъувну усталары Алимсолтан Къалсынов, Надирсолтан Амирханов оьзлерден гиччи Сайдулланы агъач къомуз, балалайка сокъма уьйретелер. Музыкагъа, макъамлагъа гьасиретлигинден Сайдулла бара-бара гитара, аккордеон, терс къомуз, пианино ва оьзге алатланы да сокъма уьйрене.
Юртундагъы школаны битдирген сонг ол Хасавюртда З. Батырмурзаевни атындагъы педагогика училищеге заочно охума тюше ва школада музыкадан дарслар юрюте. Юртунда ва районда юрюлеген гьар тюрлю концертлерде, республика оьлчевде болагъан фестивальларда ортакъчылыкъ этме башлай, алдынлы ерлени ала. 1972-нчи йыл Москвада юрюлген Бютюнроссия фестивальда ортакъчылыкъ эте. Оьзю макъамлар да чыгъарып, сёзлерин де язып, йырлама да йырлайгъаны учун огъар оьзбашына чалышагъан композитор деп ат бериле. Ол Дагъыстанны гьар тюрлю миллетлерини йырларын да къумукъчагъа гёчюрюп йырлагъан. Он дёрт согъув алатны согъуп бажарагъан Сайдулла он дёрт тилде йырлар да йырлагъан. Ону анагъа, сюювге, загьматгъа, гиччипавлагъа, парахатлыкъны якълап язгъан йырларын тынглавчулар, айрокъда къумукъ халкъ кёп сююп къабул этген.
Ол язгъан макъамланы, йырланы санаву юзден де артыкъ. Дагъыстан телевидениеде оьзюню савунда ону айрыча концерти де оьтгерилген. Ол Жаминат Керимованы, Магьаммат Атабаевни ва оьзге шаирлерибизни шиъруларына гёре макъамлар да язгъан. Огъар Дагъыстанны инчесаниятыны ат къазангъан чалышывчусу деген ат да берилген. Оьтген йыл оьзю ишлеген школаны коллективи ону 80 йыллыкъ юбилейин генг кюйде оьтгерген. Бу китапны чыгъарма да оьзю булан бирче ишлеген муаллимлер С. Атавов ва С. Бийболатова гьаракат этген.
Я. БИЙДУЛЛАЕВ.
