• Адабият

Балбаживню бёлелейи

 

Балбаживю байласын

Бешиклеге баласын.

Баласы Балбаживню

Бал къашыгъын яласын.

 

Бал къашыгъымны ялап,

Балам бал гьаллы болсун.

Балбаживге бавурлу,

Багьа балгьамлы болсун.

 

Тангхораз танкъ этгинче

Татли юхуда къалсын.

Юхулары ёкъ буса,

Балбаживюнден  алсын.

 

Баайларынг да юхлай.

Таайларынг да юхлай.

Папайларынг да юхлай.

Къакъайларынг да юхлай.

 

Топларынг да токътагъан

Бираз яллыкъ тапмагъа.

Тангала тангдан туруп,

Атылмагъа, чапмагъа.

 

Гёр, балам, онг ягъынгда,

Уьйню лап тёр ягъында,

Юхласанг, ятма къарап,

Таялгъан таягъынг да.

 

Бишевюнг де пишиллеп,

Юхлай сагъа бериде  –

Балбаживюнг боягъан,

Бёлюп салгъан териде.

 

Атынг да арып-талып,

Къалгъый тура къадалып.

Эртенги ярышлагъа

Гьазирлене ял ялып.

 

Оюнчум да ял болсун,

Ухайлары бал болсун.

Эртенинде гийинсин

Этеринден сююнсюн.

 

Бёлелейимден балам

Бал тюшлеге байыкъсын.

Байрам ярышгъа барма

Батыр болуп айыкъсын.

 

Ярышларда ягьлансын,

Якъчыларын якъласын.

Яманлыкъдан яшымны

Аллагь эсин сакъласын.

 

Яшым мени яйнасын!

Яйнай туруп ойнасын!

Оюнлардан тоймасын!

Оюнларын къоймасын!

 

Болажагъына базып,

Ёрукъ ёлгъа  ёллансын!

Ёлуна ярыкъ яйып,

Юрек оту ялласын!