Магьачкъаладагъы «Дагъыстан» деген издательство уьюнде «Къумукъ халкъ авуз яратывчулугъу» деген баш булан чыкъма герек уьч томлукъ жыйым китапланы биринчи тому чыкъгъан. Биринчи том къумукъланы йыр хазнасына багъышлангъан. Тизген, баш сёз ва баянлыкъланы язгъан профессор А.Гьажиев белгили ва гьали болгъанча кёплеге белгисиз къалып турагъан авуз яратывчулугъубузну, фольклорну асарларын къуршама къаст этген. Шо асарлар – ата-бабаларыбыздан къалгъан насигьатланы, адатланы, оьзден хасиятланы билме сюегенлер учун уллу байлыкъ. Яшларын тюзевлю тарбиягъа, чебер яратывчулукъгъа, таза къумукъ тилге уьйретме сюегенлер учун да уллу хазна. Ата-аналагъа яшлар бавларында, школаларда къолламакъ учун да исбарланып чыкъгъан бу китапда чебер асарлар ерлешдирилген.

Бёлюклеге гёре лирика асарлар, адат-къылыкъ поэзиясы, той сарынлар, яслар ва ваягьлар, алгъышлар ва къаргъышлар, тапшурмалар деген ва шолай кёп тюрлю бёлюклеге бёлюнюп ерлешдирилген асарлар охувчуну тергевюн тартажакъ.