Каспийск шагьарда тутулгъан 19 йыллыкъ Магьаммат Рамазанов, 22 йыллыкъ Гьюсен Абдуллаев ва 34 йыллыкъ Рашит Карибов полицейскийлеге чапгъын этме ва шагьардагъы килисаны атылтып от салма токъташгъан болгъан.
Ахтарывчулар аян этген маълуматлагъа гёре, Гь.Абдуллаев ва М.Рамазанов бир ерде ишлей болгъан. Къурдашлыкъ юрюте туруп ялгъан ваъзачыланы таъсирине тюшген ва «Агьлю-Сунна валь-Жамаа» деген террорчу къурумгъа къошулгъан, коллективини арасында оьзлеге ян тартардай ёлдашланы излемеге башлагъан.Ахырда оланы сыдрасына Р.Карибов да къошулгъан.
Р.Карибов алда наркотиклер саялы туснакъда туруп чыкъгъан. Жинаятчылар намарт муратларына етишмек учун атылтыв алатны этгенлер, шогъар тарыкъ гьар тюрлю алатланы ерли тюкенлерде тапгъанлар ва килисаны айланасын ахтарма башлагъанлар. Килисаны атылтгъанча полицейскийлеге чапгъын этип, оланы савутун алма хыялы болгъан.
Насипге оланы планлары йырылгъан, уьчюсю де тутулгъан.
Алав АЛИЕВ.
