Шулай аты булан оьтген жумагюн, ноябрни 17-синде, Къумукъ театрда янгы спектаклни премьерасы болду. Къаравчулардан толгъан зал спектаклни башланывун чыдамсыз кюйде къаравуллагъан. Ярыкълар сёнюп, музыка согъулду. Сагьнагъа чыкъгъан къумукъ актёрлар ва актрисалар жут-жут болуп музыкагъа гёре бийий.
Спектаклде эки ювукъ баш ролланы ойнай. Вильям–Дагъыстанны халкъ артисти Имамутдин Акавутдинов ва Жимми –Дагъыстанны ат къазангъан артисти Магьамматкамил Жабукъов. Жимми къаршы болуп къалып, тюшашда Вильямны къатыны Кетти булан (Дагъыстанны ат къазангъан артисткасы Сабият Салимова), тюшашны ювукъдагъы ресторанда олтуруп ашайлар. Бирев булан сени къатынынг ресторанда олтургъан эди деген хабар Вильямгъа етише. Шонда агьлюде къавгъа башлана. Эри къатынын къоюп гете.
Буланы авлети де ёкъ. Жагьил чагъымда яш табып боюм-союмну бузмайман деп, Кетти театрлагъа, кинолагъа юрюп, оьзю сюйген кюйде яшагъан. Бу чагъына гелгенде яш ёкълугъу агьлюге зарал гелтирегенни билип, яш тапма гёнгю болса да, эри къоюп гетген. Тек эр-къатын бир-бирин бек сюе, сагъына.
Къурдашы Жиммини къатыны айтып, Кетти интернатдан яш алып сакълама да рази. Алма да алалар. Эрине яш тапгъанман деп хабар да йибере. Ол да бек сююнюп уьюне къайта. Тек алгъан яшны анасы табыла. Бирдагъыны ала, бирдагъыны ала, оланы да аналары бар. Гьасили, спектаклде юрюлюп тургъан гьаракатлар бек къужурлу ва кюлкюлю. «Кюлей туруп, гёзьяшларым чыкъды», «кюлкюден къурсакъ этеклерим авуртду», – дейгенлер де болду.
Баш ролланы ойнагъан актёрларыбыз оьтесиз пагьмулу, къужурлу ойнады. Биринден-бирин айырып айтма да бажарылмай. Гемрини ролюн ойнагъан Россияны ат къазангъан артисти Басир Магьамматов, Петекитксонну ролюн ойнагъан Дагъыстанны ат къазангъан артисткасы Зарема Магьамматова, Межини ролюн ойнагъан Дагъыстанны ат къазангъан артисткасы Сайгидат Межитова оьзлени къужурлу, пагьмулу оюну булан къаравчуланы къурчун къандырды.
–Ингилис драматурглар М. Эннекен ва М. Мэйо язгъан бу спектаклни нечик салдыгъыз, не мурат булан?–деп сорадыкъ спектаклни салгъан белгили режиссёрубуз Ислам Казиевге.
–Буссагьат бизин къумукъ репертуарыбызда шулай къужурлу комедия ёкъ,–дей ол. –Соравну англадым, ерли авторланы спектакллери неге ёкъ деген маънада. Ерли авторланыки де бар, тек осал язылгъан, уьстюнде ишлеме тюше. Гьали Атав Атаев янгы пьесаны уьстюнде ишлеп тура, салажакъбыз. Оьзюмню пьесам да бар, «Эшек къулакъ» деген, комедия, салынажакъ. «Къанлы тойну» салма да къастыбыз бар. Бу спектакль салынгъаны да адамлар ял алсын, комедиягъа къарасын, кюлеп, гёнгюн ачып чыкъсын деген мурат булан эди.
Гёнгюн алып, кюлеп чыкъсын деген муратгъа режиссёр да, ойнагъан пагьмулу артистлерибиз де етишди деме ярай. Театрдан чыгъып барагъан къаравчуларыбыз сагьнада ойналгъан къужурлу ерлерин, кюлкюлю ерлерин бир-бирине айтып кюлей туруп барагъаны шону исбат эте эди. Сагьнаны чебер кюйде исбарлагъан Дагъыстанны ат къазангъан художниги Наби Бамматовну гьаракатын да эсгермей къойма бажарылмай.
