Арбагюн, август айны 7-нде, Дагъыстанны Башчысы Сергей Меликов бизин республикагъа инвестициялар гьисапда акъча маяланы къуршамакъ учун онгайлыкълар яратывгъа байлавлу болуп, далапчылыкъгъа къарайгъан советни генгешин оьтгерген. Шо генгешни барышында бизин республикада ювукъ вакътини ичинде яшавгъа чыгъарылмагъа тюшеген инвестиция проектлеге гёре не къадар иш юрюлегени арагъа салынып ойлашылгъан.
Дагъыстанны Башчысы Сергей Меликовну бизин республиканы экономикасын оьсювюн болдурмакъ, яшавлукъ шартланы яхшылашдырмакъ учун акъча маяланы къуршамаса бажарылмай. Шо саялы бизин республикада далапчылыкъ булан машгъул болма муштарлы гьар кимге де онгайлы шартлар яратмагъа тюше. Шону булан бирге, яшавгъа чыгъарылагъан инвестиция проектлер тергевню тюбюнде сакъланмагъа да герек. Шоланы кютегенлер де пачалыкъны янындан мекенли якълавну гьис этмеге тарыкъ. Бизин республиканы гьар министерлигинде ва ведомствосунда далапчылыкъны якълавгъа байлавлу иш гёреген жаваплы касбучулар белгиленмесе ярамай.
Сергей Меликов гьисап этеген кюйде, бизин республиканы халкъара оьлчевюнде юрюлеген форумларда ортакъчылыкъ этивю де, инвестициялар гьисапда акъча маяланы къуршамакъ учун Дагъыстанда не йимик онгайлыкълар болдурулгъанын малим этивге туврадан-тувра болушлукъ эте.
Оьтгерилген генгешни барышында оьзюню сёйлевюнде бизин республиканы Далапчылыкъгъа ва инвестициялагъа къарайгъан агентлигини ёлбашчысы Гьусейин Гьусейинов ювукъда яшавгъа чыгъарылма тюшеген проектлени малим этген. Далапчылагъа пачалыкъны янындан этилеген якълавну гьакъында да баянлыкъ берген. Ону сёзлерине гёре, буссагьатгъы вакътиде далапчылар промышленност, юрт хозяйство ва туризм тармакъларда айрыча жагьлыкъ гёрсете.
ДР-ни Башчысыны тапшурувуна гёре, бизин республиканы сан янлы ягъарлыкъ-майлав материаллар булан таъмин этмек учун юрюлеген гьаракатны гьакъында генгешде Дагъыстанны ягъарлыкъ ассоциациясыны ёлбашчысы Магьамматгьажи Гьажиэменов айтгъан.
Оьтгерилген пикру алышдырывну гьасиллерин чыгъара туруп, Дагъыстаны Башчысы советни гезикли генгешинде муниципал къурулувларда инвестициялар гьисапда акъча маяланы къуршавну масъаласына къаралажагъы гьакъында билдирген.
Н. БАЙБОЛАТОВ.
