Йыллар ва не тюрлю гьаллар «аталаса да», тюсюн-тюлюн, чинкдеси, адамлыгъын тас этмей, алтын гесек йимик асил туруп бажарагъанлар да арабызда, насипге, ёкъ тюгюл. Мен оьзюню битим-келпетин аз калималар булан сама да суратламагъа сюеген «къалам къурдашым» эрпелили Гьайбулла Гьакимович ГЬАЙБУЛЛАЕВ де шо мен сукъланып айтагъан къумукъ уланланы бирисидир.

Гьайбулла хыйлы йыллар алда оьзю­ню берекетли загьмат ёлун шагьар, район газетни редакциясында башлады. Мен ону къастлы ва табиаты таза улан экенин эслегенде, мухбирлик ишдеги башлапгъы абатларын «лавламай», болгъан чакъы аз болжалны ичинде «къатдырып» алсын учун аз-кёп буса да кёмеклерим тийди.

Ери гелгенде эсгерип къояйым, мен газетде бирче ишлеген чакъы йылланы узагъында Гьайбуллагъа бир ягъындан да гьеч багьана тапмадым. Газетни четим языв ишине битими таза сав адам гелсе, башгъаланы билмеймен, мен гьар заман оьзюме болгъан яхшылыкъгъа чакъы къувана эдим.

Тюзюн айтайым, язывгъа, тилге тувмадан тирилиги болмаса, мухбирлик саниятны сырларына тюшюнмеге оьтесиз къыйын бола. Гьайбулла редакциягъа янгы гелгенде, мухбирликни авур арбасына оьзю «егилме» тавакал этгени негьакъ болмагъанны арадан кёп гетме къоймай исбат этмеге кюй тапды. Таржумачыдан редакторну заместителини къуллугъуна ерли гётерилгени де мени шо ойларым дурус экенни ташдырадыр.

Къаламны ва каламны оьзюне ий этдирмеге амал этген гьаракатчы Гьайбулла газетден тайгъангъа мен, тюзю, къыйналдым. Неге тюгюл, гьали милли газетни «гёзел» этип торлама бажарагъанлар эпсиз къыт.

Редакцияда белбюгюп дегенлей чалыша туруп, ол оьр охув ожакъны битип, муаллим касбу алмагъа оьзю амал этди. Булай алгъанда, гьар-бир алмашынывну бир мюгьлети бола. Шолай мюгьлет етишгенни юреги булан сезген болмагъа ярай, Гьайбулла ата юртундагъы мактапгъа муаллим болуп тюшдю. Ону пагьму-гьюнерини «къазаны» мунда башгъача къайнама башлады. Гьайбулла уьй-эшикли болгъанда, ата юртунда даимликге орунлашды. Мунда оьзю башын тутгъан ишни башгъалар сукъланардай гьасиллерин тышгъа да малим этме болгъанына биз, газетни ёлдашлары да, сююндюк.

Бир гесек алда Гьайбулланы гьакъын­да район газетде гиччи оьлчевде берилген маълуматланы охугъанда гёнгюм хош болду ва шо макъалагъа саламат кюйде къошумлукълар этмеге ругьландым. Гьалиги девюрде герти муаллимлер, айрокъда эргиши муаллимлер кёп къыт. Англайгъанлар шогъар аз къыйналмай. Тек Гьайбулла йимиклер экевню, уьчевню орнун тутадыр деп айтсам, гьеч терс болмас.
Герти муаллим бары да якълардан бютюн гиши болмагъа тарыкъ. Шогъар хас къылыкъланы, хасиятланы бир ягъадан санай да турмайым. Бишген-тюшген адам гьисапда ол яшланы гьар-бир якъдан англавлу этивге, оланы арив тарбиягъа, таби этип оьсдюрювге, гьалал яшавну таза уьлгюлерине тюшюндюрювге, элине, халкъына яравлу болуп оьсдюрювге бары гючюн салып чалыша.

Ол тарих дарсланы юрюте туруп, директорну заместителини борчларын да гьеч гиши багьана тапмайгъан кюйде юрютюп гелген. Оьз элини тарихин уьйренивню ёлунда ол гёреген гьаракатны оьзгелеге де уьлгю гьисапда гёрсетмеге ярай.

Муна бу йыл 11-нчи класда ол охутагъан Мариям Гьайбуллаева Дагъыстанны тарихинден регионну оьлчевюнде болгъан уллу ярышда алдынлыкъ алгъан. Шондан сонг Мариям дагъы да Россияны тарихине гёре охувчуланы арасында оьтгерилген Темиркъазыкъ-гюнтувуш олимпиадада алдынлы ерлени бирисине ес болгъан. Уьлкени оьлчевюн гьисапгъа алып айтгъанда, бу – нечакъы бола буса да уллу уьстюнлюк.

Гьайбулла Гьакимович билим, илму дагьниси булангъы ахтарыв ишлеге де яшланы бек уста кюйде къуршап бажара. Шо тармакъда ол уьйретген яшлар олимпиадаларда, уллу, гиччи оьзге ярышларда алгъан чакъы алдынлы ерлени санай турсакъ, кёп заман гьажатлы болажакъ. Буса да бирдагъы гёрмекли уьстюнлюкню эсгермей къоймакъны яны тюгюлмен. Муна, ону Нюрьяна Алхасова деген бирдагъы охувчу къызы «Мени гиччи ватаным: табиат, маданият, миллет» деген Бютюнроссия оьлчевюндеги ярышны республика оьлчевюндегисинде биринчи ер алгъан ва эсгерилген конкурсну федерал тиретинде Дагъыстанны атындан ортакъчылыкъ этген.

Яшланы башын тутуп кёп аваралы ишлер булан янаша Гьайбулла Гьакимович оьзю де гьар тюрлю илму, билим маънасы булангъы ярышлардан «пай» алывдан хантав тюгюл. Айтагъа­ным, ол – 2022–2023-нчю охув йылда «Уллу Ватан даву: эсде сакълайбыз, оьктем болабыз» деген номинацияда бютюнроссияны оьлчевюнде оьтгерилген илму-практика конференцияда алдын болгъанланы, гёрмекли савгъатлар къазангъанланы бириси. Дагъы да ол «Мени лап муштарым гелеген иш» деген баш булан республикада оьтгерилген ярышда 2-нчи ер алмагъа амал этген. «Мени юртумну тарихи» деген конкурсну утгъан, «Юртумну турист сокъмакълары» деген ярышда райондагъы педагогланы арасында 2-нчи ерни къазангъан.

Район, республика илму-сынав конференцияланы бирин къутгъармай ортакъчылыкъ этмеге заман таба. ТОКС отрядны ёлбашчысы гьисапда ол 15 йыл бою этген чакъы асувлу ишлени санаву кёп. Муаллимлик саниятны бажарывлу кюйде юрютегени, оьз элин ахтарып уьйренивге гёре яшланы да къуршап кёп иш оьтгерегени, тизив гьасиллеге етишгени учун Гь. Гьайбуллаев Дагъыс­танны билим беривге ва илмугъа къарайгъан­ министерлигини янындан хыйлы керен гьюрметлев грамоталар булан савгъатлангъан. Бу йыл буса огъар «Россия Федерацияны билим берив тармагъыны гьюрметли къуллукъчусу» деген оьр ат берилген.

Берекетли гьаракаты булангъы башлап «газетчи», сонг муаллим болгъан Гьайбуллагъа дагъы да яхшы оьр­люклеге етишмеге савлукъ ва къайнар ругь ёрайман.