Булай ёлугъувлар таъсир эте

Ёлугъувну Гьели орта школаны къумукъ тил ва адабият дарсларыны муаллимлери Хадижат Мугьажирова ва Хатибат Хизириевна юрютдюлер. 2014-нчю йылда халкъны кёп сюеген шаири Анвар Абдулгьамитович Гьажиевни юз йыллыгъын оьтгерди. Шогъар байлавлу болуп къумукъ тил ва адабият дарсланы муаллимлери ва охувчу яшлар  шатлы ёлугъувлар гьазирледи. Мени ата юртум – Гьели юрт. Не ерлерде  болсам да, не ерлерде къалсам да, ата юртум мени юрегимде. Гьели –къужурлу тарихи, арив ерлери булангъы юрт. Бу ёлугъувну ата юртуна багъышлап Гьели школаны муаллими Ниясханум Исакъова йыр булан ачды. Охувчулар гёнгюнден айтгъан Багьавутдин Гьажиевни шиъруларын ва йырлагъан йырларын гелген къонакълар бек ушатды. Къумукъ халкъны оьктемлиги уллу шаир А.Гьажиевни шиърулары адамланы юреклерине синген. Гертиден де, ол шолай сюйкюмлю, тарбиясы да, эдеби де бар уллу шаир де дюр эди. Ону масхара шиърулары халкъны арасында айрокъда сююмлю.

Багьавутдин Гьажиев атасыны асил хасиятын, таза къылыгъын алып, оьзюню пагьмусун чарлап, бугюнлерде де Гьажиевлени фамилиясын оьрге гётерип тура.

Гетген йыл къумукъ халкъны аявлу къызы, СССР-ни халкъ артисткасы Барият Муратованы юз йыллыгъы оьтгерилген эди. Б.Муратованы Багьавутдин Гьажиев эс тапгъанлы таный. Олар маданиятны ёлундагъы ювукъ аралыкъларындан къайры, бир-бирине хоншулар да болгъан. Шогъар ба­гъышлап Гьели орта школаны «Яш къаламлар» деген адабият кружокну ортакъчылары «Молла Насрутдинден» гесекни гёрсетдилер.

Багьавутдин Анваровичге:

– Гележекде дагъы да не йимик ишлер этмеге гёз алгъа тутгъансыз, – деп сорадым.

– Мени ювукъ арада «Уьч ачгъыч» деген яшлагъа язылгъан шиъруларым китап болуп чыгъа. Ондан къайры да, янгы пьесаны уьстюнде ишлеп тураман. Дагъы да язылгъан комедиям бар, шо да театрда салынажакъ.

–Гьали яшавда кёбюсю халкъ оьзюню тувмадан берилген тилин унута бара. Гёз алдыбызда оьсюп гелеген яшлар кёбюсю орус тилде сёйлей. Сиз нечик гёресиз, адам оьзюню къумукъ тилин билмесе, къумукъман деп айтып боламы?

– Болмай. Бир де ярамай ана тилин унутмагъа. Мен шагьарда ва юртдагъы яшлагъа тергев этип тураман, юртдагъылар да тилин осал биле. Яшлар шиъруну охуйгъанда,  сёзлени тюз айтмайлар. Олай болгъан сонг, ана тилге бек тергев этмеге герек. Биринчи класдан берли адабият тилинде сёйлейген кюйге яхшы уьйретмеге герек. Ана тилин билмеген адам бир ерде де ёл тапмас. Ватанын да тас этежек. Бугюн сиз оьтгерген чарагъа рази болдум. Юртланы къайсына барсам да, бек абурлап, сююп янашалар. Мени атам Гьелини гьакъында язгъан. Мунда ону кёп ювукълары болгъан. Къурдашлары бар эди. Булай ёлугъувлар магъа айрыча таъсир эте.

– Багьавутдин Анварович, биз сизге савлукъ, узакъ оьмюр, шат яшав, гележекде яратывчулукъ ишде уллу уьс­тюнлюклер ёрайбыз!

– Кёп савболугъуз, баракалла.

 У. ХАЛИЛОВА.

СУРАТДА: Б. Гьажиев яшлар булан.

 

Авторизация
*
*
Регистрация
*
*
*
Согласны с условиями сайта?
Генерация пароля