Тюшюм – къуллукъгъа гёре

  Бу йыл Буйнакск районну авлакъларында къылчыкълы ашлыкъланы орув къурумлу оьтдю демеге ярай. Неге тюгюл, ашлыкъ къайтарывну болжаллары етген вакъти чакъ ачыкъ болуп турду. Районну ашлыкъ оьсдюрювчюлерини барысыны да дегенлей гёнгю хош. Тек тёкген къыйынына гёре гелим алып болмай къалгъанлар да ёкъ тюгюл.

  О гьакъда сёз чыкъгъанда, Буйнакск районну юрт хозяйство бёлюгюню къуллукъчулары алдын йимик чачыв оборотланы низамын юрютмеге кюй тапгъанланы ишлери, чакъ узакъ заман къургъакъ болгъанына да къарамай, бек тюзелгенни айтды. Топуракъланы сюрюп бир йылгъа къоягъанлыкъ шону дагьнисин, гючюн сакъламагъа кёмек эте. Сонг да, гюч чатагъан къадарда сама оьсюмлюклеге кюйлевючлер де бере турмагъа тюше. Шо заман топуракъ тер тёкген загьматчыгъа залимден къайтарыш да эте.

Муна «Гьажимурзаев», «Улей» деген сабанчы-фермер хозяйстволаны есилери оьзлени ашлыкъ тарлавларыны гьар гектарындан 35–38 центнер тюшюм алмагъа болгъанлыкъ биз оьрде эсгерген токъташдырывну гьакълыгъын мекенли кюйде ташдыра. Бир гектардан 23 центнер алгъан сабанчылар да бар. Баягъы, мол тюшюм сюегенлер сюрюв, чачыв ва къалгъан оьзге авлакъ ишлени тийишли заманында ва айсенилик этмей оьтгермеге герек экенни ишни натижалары гёрсетип тура.

Май айны 14-нде, Россия Федерацияны Гьукуматы сугъарыв системаланы онгармакъ, сугъарылагъан тарлавланы оьлчевлерин артдырмакъ муратда 2022-нчи йылдан 2031-нчи йылгъа ерли къарар къабул этген. Шо болжалны ичинде федерал бюджетден таба 500 миллиард манатдан да къолай акъча гёрсетилежек. Шо буса топуракъланы пайдаландырма къолай имканлыкъ береген къуллукъланы барысыны да дегенлей даражасын гётермеге, тюшюмлени ва берекетни кёп этмеге онгайлы шартлар яратмагъа болушлукъ этежек.

Бугюнлерде районну ашлыкъ оьсдюрювчюлери сюрювге, сонг чачывгъа гиришмеге баш чарасын гёрюп тура.

–Чачыв майданларын кёп этмеге онгай бармы? – деген соравума, районну юрт хозяйство бёлюгюню башчысы М.Гьажимурзаев булай жавап берди:
– Тюзюн айтайым, о масъаланы чечмеге буссагьат тынч тюгюл. Неге десегиз, энни пайланмагъан, гесекленмеген ер ёкъ. Кёп ерлени сюрмеге, шолагъа бюртюклю ашлыкъланы чачмагъа сюегенлер бизде ёкъ тюгюл. Баягъы, адамлар оьзлени пайларын бермеге къабул тюгюл. Оьзлер де ишлетмей чи. Муна бу йыл сабанлыкъланы барлакълагъа айлангъан ерлеринден бир тай бичен де алынмады. Сонг да, бир тайпалар гьали де сабанлыкъланы бош къойма ярамайгъанны англап битмей. Нете, яманмы, оьзлени пайларын ишлетмеге бергенлеге бу йыл хыйлы салам тай къайтарыш гьакъ гьисапда берилди. Сюегенлеге будай да бериле.

Бу масъаланы ерли гьакимиятлар ювукъ арада бир ёрукъгъа гелтирмесе ярамай.

Авторизация
*
*
Регистрация
*
*
*
Согласны с условиями сайта?
Генерация пароля