«Турна» республикада алдынлы ерде

18 января 2021 в 23:13 126
Буйнакск районну Халимбекавулундагъы «Турна» деген яшлар баву республиканы лап да яхшы яшлар баву деп белгиленген.

Буйнакск районну пресс къуллугъу билдиреген кюйде, Халимбекавулдагъы «Турна» деген яшлар баву, республикада оьтгерилген «Дагъыстанны лап да яхшы яшлар баву-2020» деген ярышларда ортакъчылыкъ этип, алдынлы ерге ес болгъан.

«Турна» деген яшлар баву 1915-нчи йылда ачылгъан ва татывлу коллективде 20 адам ишлей. Артдагъы гюнлерде яшлар бавунда Буйнакск районну билим берив управлениесини ёлбашчысы Аида Залимханова къонакълыкъда болгъан ва коллективни уьстюнлюгю булан гьакъ юрекден къутлагъан.

«Сизин яхшы, исси коллективигиз бар ва шо лап да аслу зат, неге тюгюл де не тюрлю программалар, билим беривню не тюрлю янгы къайдалары арагъа чыкъса да, яшланы сюеген, оьзлени касбусуна берилген ишчилер болмаса, бир зат да бажарылмай. Мен сизин лайыкълы уьстюнлюгюгюз булан къутламагъа сюемен ва гележекде де сизге янгы уьстюнлюклер ёрайман», - деген Аида Залимханова оьзюню къутлав сёзюнде.

Эсгерилеген кюйде, конкурсда республиканы районларыны ва шагьарларыны лап да яхшы яшлар бавлары ортакъчылыкъ этген.