Къаягент районлуланы тохув инчесаният хазнасы

Къаягент районлуланы тохув инчесаният хазнасы

О гюнлерде редакциягъа Къаягент юртдагъы 1 номерли орта школаны суратлав инчесаниятдан ва черчениеден дарс береген муаллими Иса Исаев гелди. Ол оьзю чыгъаргъан эки китапны савгъат этди. Бириси бу йыл Магьачкъалада, «Алеф» деген издательствода чыкъан «Искусство каякентских паласов», деген китап. Алда чыкъгъанына «Каякентские ковры-паласы» деп ат салынгъан.


Авторну гьакъында айтсакъ, ол ДР-ни ат къазангъан муаллими. РФ-ни умуми билим берив тармагъыны гьюрметли къуллукъчусу. Магьачкъалада М.Жемалны атындагъы чебер училищени оьр къыйматлагъа битдирген. 1985-чи йылда буса Къубандагъы пачалыкъ университетни чебер ва техника графика факльтетин битдирген. Загьмат ёлун Къаягентдеги бир номерли школада суратлав инчесаниятдан (ИЗО) дарс беривчю болуп башлагъан ва гьали де онда ишлей.


2006-нчы йылда «Билим» деген мили проектде ортакъчылыкъ этип Президентни Грантына ес болгъан. Авторну эки де китабы ренкли жылтлары булан кимнм де тергевюн тартардай онгарылгъан. Къаягент юртну гьалиги гёрюнюшю ва инкъылапдан алдагъы заманда чыкъгъан, жылтлагъа салынгъан суратлар айра да тергевню тарта. Къаягент халилер-паласлар деген китапны ичлиги дёрт айры-айры бёлюклеге къуршалгъан. «Гиришив», «Къаягентли уста къатынланы халкъ яратывчулугъуну аслу кюрчюлери», «Къаягент мили орнамент», «Къаягент паласны юрт школада гечив». Бу гьар бёлюкге гёре айрыча маълуматлар бериле. Тохувчу уста къатынланы атлары, суратлары булан бирче олар тохугъан алатлар ренкли суратлар булан гёрсетиле.


Бу китаплар халкъ яратывчулукъда тохув ишлер булан машгъул болагъанлагъа айрокъда гьажатлы деме ярай. Билим берив ожакъларда суратлав инчесаният дарслар юрютеген касбучулагъа пайдалы. Ата-бабаларыбыздан къалгъан бу байлыкъны, варисликни унутма къоймай китаплагъа салгъан Иса Агьматович гележек наслулар учун да этген къуллукъ макътавгъа тийишли.