Газет булан байлавлукъну уьзмеди

6 февраля 2022 в 07:17 80

Мен бир вакъти Къызылюрт шагьарда фосфор тузлар чы­гъарагъан заводда ишледим. О заманларда бу зор уллу агьамияты булангъы промышленный предприятиеге Шамил Магьамматович Зайналов ёлбашчылыкъ эте эди. Дада Абдурагьманов булан ювукъдан шонда таныш болдум.

 1980-нчи йылларда рес­публика янында ва «Солакъны тангы» деген бирлешген шагьар газетни редакциясында штатда тюгюл мухбирлер булангъы иш оьр даражада юрюле эди. Бизин тамазабыз Дада Абдурагьмановични химик­лени, шагьарлыланы ва юртлуларыны яшав гьалын суратлайгъан макъалалары газетни бетлеринде ерлешдирилип турду.

Тамаза не заманда да анадаш тилибизде чыгъагъан «Ленин ёлу», энни «Ёлдаш» газет булан аралыкъны хыйлы йыллар юрютюп тургъан. Уллу Ватан давну ветераны булангъы лакъыр нечесе гезиклер ону уьюнде-ожа­гъында болгъанда да сагьатлар булан узатыла эди. Балики, шолай пайдалы ёлугъувлар себепли де болгъандыр магъа къаламымны къолдан тюшюрмейли, бугюн де къолъязывларымны артын уьзмейли анадаш тилибизде чыгъарыла­гъан «Ёлдаш» газет булан аралыкъланы бирден-бир артдырмагъа. Гёресиз, энни арабызда тамазаларыбыз да ёкъ. Биз чагъыбызгъа гёре оьзюбюз де уллу болгъанбыз ва шолар тутгъан ёлну узатма къасткъылажакъбыз. Бу ерде мен «ал дёгерчик гьыз этсе, арты да шондан юрюр» деген айтывну эсгермекни тийишли гёремен.

Дада Абдурагьманович оьзю топлагъан бай сынавну авлетлерине, оланы авлетлерине ва яшёрюмлеге къойду. Ол савлай Къызылюрт районну ва Солтан Янгыюртну жамият яшавунда да актив кюйде ортакъчылыкъ этген, охувчулар ва яшёрюмлер булан ёлукъгъан, етишип гелеген яш нас­луну патриот ругьда тарбиялавда да оьз къошумун болдургъан. Ахырынчы гюнлерине ерли «Ёлдаш» газет булан аралыкъны уьзмеди.

Уллу Ватан давну ортакъчысы Дада Абдурагьманович Абдурагьманов 102 йыллыкъ чагъында, 2018-нчи йылда гечинген. Аллагь рагьмат этсин! Жаны женнетлени тёрюнде болсун!