Бир нече гюн алда оьтген сайлавларда Дагъыстандан Россия Федерацияны Пачалыкъ Думасына ва Дагъыстан Республиканы Халкъ Жыйынына депутатлар сайланды. Пачалыкъ Думагъа сайлангъан депутатланы арасында къумукълар ёкъ экени, озокъда, ойлашдыра. Республиканы парламентине буса бизин миллетден сайлангъан 9 депутат бар.
Алимурат Агьматович Гьажиев (Хумторкъали райондан сайлангъан, Къарабудагъгентде тувгъан), биология илмуланы кандидаты, доцент, Дагъыстан пачалыкъ университетде экологияны ва оьсювню институтуну директору, шо университетни жагьил алимлерини советини председатели, «Единая Россия» партияны члени.
Мурат Шейхович Исмайылов (Къаягент райондан сайлангъан), экономика илмуланы кандидаты, «Единая Россия» политика партияны члени.
Магьамматсолтан Байболатович Магьамматов (Къарабудагъгент райондан сайлангъан), экономика илмуланы кандидаты, Дагъыстан Республиканы Халкъ Жыйыныны депутаты болуп кёп керенлер сайлангъан, «Единая Россия» партиядан.
Баттал Ражабович Батталов, «Единая Россия» партиядан. Дагъыстан Республиканы Халкъ Жыйыныны промышленностгъа, транспортгъа ва байлавлукъгъа къарайгъан комитетини председатели, сонг буса билим, илму, ва маданиятгъа къарайгъан комитетини председатели болгъан.
Абдулла Вахаевич Магьамматов (Бабаюрт райондан сайлангъан). «Единая Россия» политика партиядан. Буссагьатгъы вакъти Россияны Пенсия фондуну Бабаюрт районундагъы управлениесини начальниги.
Уллубий Умарпашаевич Абуков (Хасавюрт шагьардан). «КПРФ» партияны члени. Газпромну Хасавюртдагъы «Западное» деген районара управлениесини директору.
Асият Наримановна Алиева, «Единая Россия» партияны члени, Дагъыстан Республиканы Халкъ Жыйыныны аграр политикагъа ва табиат къоллавгъа къарайгъан комитетини председатели болуп чалышгъан.
Жамболат Шапиевич Салавов (Хасавюрт райондан), «Единая Россия» партияны члени. 2009-нчу йылдан берли Хасавюрт районну башчысы болуп чалыша.
Завур Асевович Аскендеров, «Единая Россия» деген партияны члени. Россия Федерацияны Пачалыкъ Думасыны депутаты болуп бир нече керен сайлангъан. Экономика политикагъа, промышленностгъа, инновация оьсювге ва далапчылыкъгъа къарайгъан комитетни члени, «Деловая Россия» деген Бютюнроссия жамият къурумну Дагъыстан регион бёлюгюню председатели.
Озокъда, халкъ сайлагъан депутатлар – бизин республиканы парламентинде пачалыкъ масъалалар булан бирче гьар биревню гьайын этип де гьаракатчылыкъ иш юрютме герекли халкъ вакиллери. Оланы иши аслу гьалда адамланы яшавлукъ шартларын яхшылашдырмакъ учун белгилене. О – бек жаваплыкъны талап этеген гьаракат.
