Атлары орамлагъа къоюлду

21 апреля 2021 в 11:38 177
Атлары орамлагъа къоюлду

Бу йылны башында Таргъу юртда болгъан къайгъылы агьвалатда, таргъулу яш уланлар Вали Абдурагьимов ва Керим Хайруллаев наркотиклени къоллавну ва яйылывну алдын алмакъ муратда къаршылыкъ билдирип, жанларын къурбан этген деген аччы хабар, ачыкъ гюн кёк кёкюрегенде йимик, савлай Дагъыстангъа чалт етишди. Шо хабарны эшитгенлени юрек­лерине пашманлыкъ салды.


Эки де улан къоркъунчлу, савлу­гъуна зараллы агъуну яягъанлар булан бетге-бет чыгъып, шолагъа къаршы ябушуп, игит кюйде жанларын къурбан этдилер. Уланланы ата-аналары, таргъулулар, савлай къумукъ халкъ учун да бек авур, эсден таймас къайгъы болду.


Бу эки де уланны оьзлени гёз алдындан торайып гелеген яш наслу наркотиклени къоллап, бузулуп барагъанына юреги чыдамагъандыр. Олар наркотиклени яягъанлагъа къаршы чыгъып, бетге-бет токътамаса, бу масъалаланы дагъы кюйде чечмеге бажарылмайгъанны англагъандыр. Шону учун да олар наркотиклени яягъанлар булан бетге-бет ёлугъуп сёйлешмеге, тартынмайлы туврасын айтмагъа, къоччакъ кюйде оьлюмню уьстюне баргъанлар. Шону учун да игит кюйде жанларын къурбан этген. Эки де таргъулу къагьруманлар къумукъ ва дагъыстан халкъланы эсинде узакъ замангъа къалажакъ.


Бизин яш наслубузну гележеги учун жанларын къурбан этген таргъулу уланлар Вали Абдурагьимовну ва Керим Хайруллаевни игит ишлерин эсде сакъламакъ учун Хумторкъали районну Къоркъмаскъала юрт жыйыныны депутатлары экисини де Тёбе посёлокдагъы «Къоркъмаскъала – 3» деген дачалардагъы эки уллу орамгъа атларын къоймакъ деп къарар чы­гъаргъан.


Гетген сонгугюн дачаларда наркотиклени яягъанлагъа къаршылыкъ билдирип, жанлары къыйылгъан таргъулу уланлар Вали Абдурагьимовну ва Керим Хайруллаевни атларын къоюп, ва эсделик такъталагъа салывгъа байлавлу чараларда Къоркъмаскъала юрт жыйыныны депутатларыны председатели Нурутдин Загьиров, Къоркъмаскъала юрт администрациясыны башчысыны заместители Шамил Болатов, дачаланы ёлдашлыгъыны председателини заместители Магьаммат Алибеков, «Ёлдаш» газетни Хумторкъали райондагъы оьз мухбири Жават Закавов ортакъчылыкъ этдилер. Вали Абдурагьимовну ва Керим Хайруллаевни атларын къоювгъа байлавлу чаралагъа оланы ата-анасы, дос-къардашлары, юртлулары да чакъырылгъан эди.


Таргъулу уланланы атларын дачалардагъы эки уллу орамгъа къоювгъа багъышлангъан жыйынны ача туруп, Къоркъмаскъала юрт жыйыныны депутатларыны председатели Нурутдин Загьиров наркотиклени яягъан ва къоллайгъан адамлагъа туврадан-тувра къаршы чыгъып, дюньядан чакъсыз гетген Вали Абдурагьимовну ва Керим Хайруллаевни атларын орамлагъа къоймагъа юртлу депутатлар къарар чыгъаргъанны гьакъында айтды. Ондан сонг чыгъып сёйлегенлер Къоркъмаскъала юрт админист­рацияны башчысыны заместители Шамил Болатов, «Къоркъмаскъала-3» дачаланы председателини заместители Магьаммат Алибеков, «Ёлдаш» газетни Хумторкъали райондагъы оьз мухбири Жават Закавов къоркъунмайлы, тартынмайлы наркотиклени яягъанланы алдын алмагъа баргъаны, яш наслуну гележеги учун жанларын къурбан этгени гьакъда айтдылар.


Вали Абдурагьимовну атасы Нюрютдин ва Керим Хайруллаевни анасы Муслимат, Таргъу юртну жамият советини председатели Магьамматамин Магьамматов ва олар булан гелген дос-къардашы Къоркъмаскъала юрт администрациясыны ва юрт жы­йынны депутатларына, «Къоркъмас­къала-3» дачаланы ёлбашчысы Элдар Магьамматовгъа ва къоркъмаскъала жамиятына наркотиклеге къаршы ябушувда жанларын берген уланларыны атларын инг де уллу орамлагъа къойгъаны учун оьзлени разилигин билдирди.


Автор: З. Акавов.