Яшёрюмлер бизин яшавну къайсы тармагъында да гележегибиз экенни билебиз. «Ёлдаш» газетде ва башгъа милли газетлерде де яш касбучулар, ана тилинде язагъан журналистлер етишмейгени кёп йыллар бола.
Алдагъы гюнлерде буса «Ёлдаш» газетни баш редактору Рашит Забитович Акавовну гьаракаты булан бизин редакциягъа Дагъыстан пачалыкъ университетни филология факультетини журналистлер гьазирлейген бёлюгюнден студентлер къонакълай гелди. Редакциягъа оланы гелмеклигини мурады, озокъда, газетни редакциясыны къуллукъчулары, гьаракаты ва газетде чыгъагъан макъалалар булан таныш да болуп, оьзлени макъалаларын язывда сынавлу мухбирлерден, газетни къуллукъчуларындан насигьатлар алмакъ эди.
Баш редакторну кабинетинде студентлер газетни къуллукъчулары булан таныш болду. Газетни ишини, яшавуну гьакъында англатыв берилген сонг, Рашит Забитович студентлени оьзлер айыргъан масъалалагъа гёре редакцияны экономика бёлюгюню редактору Къарамагьаммат Къараевге, маданият бёлюгюню редактору Яраш Бийдуллаевге, билим берив ва яшёрюмлени масъалаларына жаваплы Патимат Бекеевагъа тапшурду.
Студентлени оьзлени гьакъында айтсам, оланы гьарисини тергевюн тартагъан, язывда биринчи абатларын алып язмагъа сюеген темалары бар. Мисал учун, журналист бёлюкню 3-нчю курсуну студенти Шавхал Абдурашитов спорт теманы айланасында язып чыгъаргъан бир нече макъалалары бар, демек, журналист ишде аз буса да сынаву бар деп айтмагъа ярай. Журналистни касбусун буса, бизин республиканы маълумат агентлигинде чалышагъан агъасы Азнавур Абдурашитовдан уьлгю алып, ону чалышывун къужурлу гёрюп, ушатып сайлагъан. Шавхалны гележекде де спортну, экологияны, жамият масъалаланы айланасында язмагъа хыялы бар.
Сайида Залибекова да журналистлер гьазирлейген бёлюкню 3-нчю курсунда охуй. Сайида «Ёлдашгъа» биринчилей гелгенин ва газетни коллективи башында Рашит Забитович де булан илиякълы, кёп сююп къаршылагъанына бек рази болгъанын да эсгерди. Сайиданы жамият арадагъы итти масъалаланы ахтармагъа ва маданият, инчесаният темалагъа макъалалар язмагъа иштагьы бар.
Студент къыз Анна Сапарова буса журналистлени гьазирлейген бёлюкге охума тюшмеге лап ахырда ойлашгъан. Ону дюнья яшавундан маълуматлагъа ес болуп, бизин айланабыздагъы масъалаланы чечивде оьзюнден болагъан къошумну этмеге, адамланы яшавун яхшы якъгъа алышдырывда къол ялгъамагъа умуту бар.
Уркият Давутова Бабаюрт районну Янгы Коса деген юртундан гелип журналист бёлюкде охуй. Ону гиччиден берли журналист болмагъа умуту болгъан. Ата-анасы, эркъардашы ол танглагъан касбугъа къаршы болса да, школаны охуп битген сонг оьзюню мурадына етишген. Бугюнлерде Уркият 3-нчю курсда охуй. Ол гьар тюрлю темалагъа язмагъа хыял эте буса да, бизин редакциягъа маданият темагъа язмагъа хыяллы. Уркият адабиятны да кёп сюе.
Гертилей де, редакциягъа гелген студент къызланы ва уланланы журналист болмагъа къасты бар экенин эследик. Олагъа редакцияны къуллукъчулары оьзлер айыргъан темалагъа гёре макъалалар язмагъа тапшурувлар да, насигьатлар да берди. Журналист касбуда къаламларын «чарлама» башлайгъан яшёрюмлеге инг итти масъалаланы гётермеге илгьам ва уьстюнлюклер ёрай туруп, оьзгелерден де бизин газетни бетлеринде чыгъармагъа гьар тюрлю масъалалагъа гёре макъалалар къаравуллайбыз.
