БИРЕВ ДЕ УНУТУЛМАГЪАН...

Жамият Ёлдаш
11 апреля 2022 в 16:13 32

Уллу Ватан давну актив ортакъчылары

 Немис-фашист елевчюлер сююмлю элибизге намарт кюйде чапгъын этип, къыйынлы гюнлер гелгенде савут да тутуп, Ана Ватанны якъламагъа минглер булан совет ватандашлар гётерилди. Шолагъа 2634 къаягентрайонлулар да къошулду. Давгъа гетгенлени 1004-сюне ата юртуна, агьлюлерине къайтмагъа насип болмады. Тёбенде Уллу Уьстюнлюкню къазанмакъ учун инг гёрмекли къошум этгенлерини игит ишлери гьакъда къысгъача маълумат беребиз.

 Абдурашит Магьамматович Ибрагьимов – атышывчу батальонну командири, майор. Дав Къызыл Байракъ, Къызыл Юлдуз, Уллу Ватан давну 2-нчи даражалы орденлери ва 15 медаль булан савгъатлангъан. Москваны якълавчусу.1941-нчи йылны ноябр айыны 7-синде Москвада болгъан асгер Парадны ортакъчысы. 1945-нчи йылны январ-февраль айларында Венгрияда Балатон кёлню айланасында, Секешвахервар шагьар учунгъу къызгъын давларда гёрсетген къоччакълыгъы учун А.Ибрагьимов Советлер Союзуну Игити деген оьр атгъа гёрсетилген. Гьар тюрлю себеплеге гёре, ­огъар Алтын Юлдузну орнуна Дав Къызыл Байракъ ордени берилип къалгъан.

Умар Нугьтуллаевич Агъаев – атышывчу ротаны командири, старший лейтенант, Суворовну 3-нчю даражалы, Къызыл Юлдуз, Уллу Ватан давну 1 даражалы орденлери ва кёп санавдагъы медаллар булан савгъатлангъан. Кавказны якълавчусу, 15-нчи Сиваш дивизияны 321-нчи полкуну ротасыны командири гьисапда Польша, Чехословакия, Болгария, Австрия, Венгрия, Югославия пачалыкъланы азат этивде ортакъчылыкъ этген.

Жамалутдин Гьамзатович Гьамзатов – артиллерия батареяны командири, старший лейтенант, Къызыл Юлдуз, Уллу Ватан давну 1 ва 2-нчи даражалы орденлери ва медаллар булан савгъатлангъан.

Магьамматэмин Агъаев – ­танклагъа къаршы дав этеген батареяны командири, Къызыл Юлдуз, Уллу Ватан давну 1-нчи даражалы орденлери, медаллар булан савгъатлангъан. Генерал Родимцевни айтылгъан 13-нчю дивизиясында къуллукъ этген, Сталинград учунгъу давланы актив ортакъчысы. Сонг Украинаны, Польшаны, Чехословакияны, Румынияны, Австрияны, Венгрияны азат этген. Уьстюнлюкню гюнюн Прага шагьарда къаршылагъан.

Жамалутдин Шахшавекович Арслангереев – 461-нчи атышывчу полкну разведчиги, ефрейтор, Къызыл Байракъ, Къызыл Юлдуз орденлер ва медаллар булан савгъатлангъан. Тиса оьзенни ари бетине чыгъывда, Будапешт учунгъу давларда кёп игитликлер гёрсетген. Давну йыракъ Манчжурияда тамамлагъан.

Къасум Алациевич Къасумов – 11-нчи гвардиялы атышывчу корпусну сыдыраларында къуллукъ этген, Дав Къызыл Байракъ орден ва медаллар булан савгъатлангъан. Парахат яшавдагъы къайратлы загьматы учун У.Буйнакскийни атындагъы колхозну председатели Къ.А.Къасумов Ленин ва Загьмат Къызыл Байракъ орденлери булан да савгъатлангъан.

Хизри Алиев – старший сержант, атышывчу бёлюкню командири, 2 Къызыл Юлдуз, Макътавлукъну 3-нчю даражалы орденлери ва медаллар булан савгъатлангъан. Кавказны якълавчусу, Таман ярыматав, Сапун тав, Севастополь учунгъу давланы игити. Уьстюнлюкню гюнюн Кёнигсберг шагьарда къаршылагъан.

Абдурагьман Абдурагьимов – рядовой, 2 Къызыл Юлдуз орден, медаллар булан савгъатлангъан. Днепр ­оьзен, Курск, Орёл шагьарлар учунгъу ва оланы айланасында болгъан къызгъын давланы актив ортакъчысы ва игити. Давну Кёнигсберг шагьарда тамамлагъан.

Муслим Элдерханов – капитан, 32-нчи Смоленский дивизияны 121-нчи атлы полкуну эскадронуну командири. Игит ишлери учун къоччакъ офицер Уллу Ватан давну 1-нчи даражалы, Къызыл Юлдуз, Александр Невский орденлер ва медаллар булан савгъатлангъан. Сталинград учунгъу давланы игити. 4 керен яралангъан, ата юртуна оьлген деген хабар эки керен етишген. Артдагъы игитликни Витебск областны Городок деген шагьарыны ягъасында 1943-нчю йылны ноябр ­айыны 19-нда гёрсетген, авур яралангъан. Госпитальдан сонг ата юрту Оьтемишге бакъдырылгъан.

Къадирбек Къадирисович Шихшабеков – старший сержант, асгер бёлюкню командири. Прибалтика республикаланы азат этив давларда Макътавлугъуну 3-нчю даражалы ордени, медаллар булан савгъатлангъан. Ону игит ишлери гьакъда армия газетлени бетлеринде язылгъан.

Али Адавов – сержант, асгер бёлюкню командири, уьлкебизни темиркъазыкъ дазуларында асгер къуллукъларын кютген, кёп игитликлер гёрсетген. Орденлер ва медаллар булан савгъатлангъан. Советлер Союзуну Игити деген атгъа гёрсетилген. Тек сыйлы савгъат тапшурулмагъан.

Исрапил Алиев – старший лейтенант, Къызыл Юлдуз, Уллу Ватан давну 1-нчи даражалы орденлери булан савгъатлангъан. Парахат яшавдагъы къайратлы загьматы учун «Къаягент» деген совхозну бёлюгюню башчысы Исрапил Алиев Загьмат Къызыл Байракъ ордени булан да савгъатлангъан.

Къазимагьаммат Магьамматович Абдулгьалимов – байлавлукъну болдурагъан асгер бёлюкню командири, Къызыл Юлдуз, Уллу Ватан давну 2-нчи даражалы орденлери ва медаллар булан савгъатлангъан.

Александр Дмитриевич Цымбалюк – сержант, атышывчу асгер бёлюкню командири, Къызыл Юлдуз, Макътавлукъну 3-нчю даражалы, Уллу Ватан давну 1-нчи даражалы орденлери, медаллар булан савгъатлангъан. 1945-нчи йылны ноябр айыны 7-синде Москвада болгъан асгер Парадны ортакъчысы.

Абилитдин Жамалутдинов – старший лейтенант, атышывчу ротаны политика ишлеге къарайгъан заместители, Къызыл Юлдуз, Уллу Ватан давну 2-нчи даражалы орденлери, медаллар булан савгъатлангъан.

Шарап Султанович Къамболатов – подполковник, Дав Къызыл Байракъ орден ва медаллар булан савгъатлангъан.

Рагьим Рагьимов – полковник, 2 Къызыл Юлдуз, Уллу Ватан давну 1-нчи ва 2-нчи даражалы орденлери, медаллар булан савгъатлангъан.

Шапи Муртузалиев – Уллу Ватан давну актив ортакъчысы, асгер къуллукъларын кюте туруп, кёп игит­ликлер гёрсетген. Къызыл Юлдуз, Уллу Ватан давну 1-нчи ва эки керен 2-нчи даражалы орденлери, медаллар булан савгъатлангъан.

Алексей Чёрных – Уллу Ватан давну актив ортакъчысы, асгер къуллукъларын кюте туруп, кёп иги­тликлер гёрсетген. Макътавлукъну 2-нчи ва 3-нчю даражалы, Уллу Ватан давну 1-нчи даражалы орденлери ва медаллар булан савгъатлангъан.

Магьаммат Алациев – сержант, пулемётчуланы бёлюгюню командири, Сталинград учунгъу давланы актив ортакъчысы. 62-нчи армияны командири генерал Чуйковну адъютанты гьисапда белгили. Макътавлукъну 3-нчю даражалы ордени, кёп медаллар булан савгъатлангъан.

Къайырбек Къайырбе-ков – сержант, 2-нчи Белорус фронтну 10-нчу атышывчу дивизиясыны танклагъа къаршы дав этеген дивизионуну бёлюгюню командири, Къызыл Юлдуз, Уллу Ватан давну 1-нчи даражалы, Макътавлукъну 3-нчю даражалы орденлери, медаллар булан савгъатлангъан. Артдагъы игитлигин 1945-нчи йылны март айында Германияны Руммельсбург шагьарын елейгенде юрюлген давланы вакътисинде гёрсетген.

 

Магьаммат-Расул ИБРАГЬИМОВ.