Алдагъы жумада буса Дагъыстан Республиканы транспортуну ва ёл хозяйствосуну министерлигинде Бурлият Ибрагьимованы атындагъы фондну ачылыву болду. Мунда эсгерилген фонд учун иш кабинет гёрсетилген.

      Шо гюн Бурлият Ибрагьимованы фондуну ачылыву булан къутлама йыравлар, композиторлар, жамият чалышывчулар, охувчу яшлар ва дос-къардашы гелген эди. Оланы гьариси фонд булан байлавлу оьз­лени ойларын, ёравларын айтды. Таргъудагъы 19 номерли школаны охувчу яшларыны хору йырлар йырлады.

      Бурлият Ибрагьимова оьзю де эсгерген кюйде, гележекде йырланы язып, дисклер де чыгъарып бола­гъан кюйде студия ачмагъа гёз алгъа тутгъан.

      Фондну алдында гёз алгъа тутулгъан ишлени гьакъында айта туруп, Бурлият Ибрагьимова булай деди:

     –Мен оьзюм билегенли, яш заманымдан тутуп, савлай оьмю­рюмню инчесаниятгъа багъыш­ла­гъанман. Гиччиден тутуп сагь­нада ишлегенмен. Узакъ йылланы ичинде сагьнада, инчесаният тармакъда топла­гъан сынавумну кёмеклиги булан янгы пагьмуланы арагъа чы­гъарма, олагъа йырланы сайламагъа, сагьнаны сырларына тюшюнмеге, оьр даражада бизин йырларыбызны абурун гётермеге уьйретмеге сюемен. Бугюнлерде бизин халкъ сарынланы йырлай­гъанлар кёп аз болгъан. Гьар ерден бир сатырны алып, къошуп-чатып, маънасы ёкъ йырлар йырлана, сагьна тойгъа айланып къалгъан. Яш йыравларда милли ругьну гётермеге, халкъ йырланы къайтып арагъа чыгъармагъа герек. Мен оьзюмню чагъыма да къарамайлы, гьар тюрлю концертлеге барып, яш пагьмуланы арагъа чыгъарып, оланы тавушу булан ишлемеге, репертуарын топламагъа гьазирмен, тарыкъ болса, харж якъдан кёмек де этежекмен.

     Бурлият Ибрагьимовагъа юрегиндеги асил ва пайдалы муратлагъа етишмекни гьакъ юрекден ёрайбыз.

П. БЕКЕЕВА.