Бабаюрт районну билим берив тармагъында касбу пагьмусу ва бажарывлугъу булан ишлейген муаллимлер аз тюгюл. Олар оьсюп гелеген яш наслугъа терен ва мугькам билимлер берип, гележекде оьр даражалы касбучулар болуп арагъа чыгъар йимик къастын болдура. Шолай бажарывлу муаллимлени гьакъында айта туруп,  биз Рамазан Пашаевич Териковну атын да эсгерсек тюз болар.

Ол артдагъы  36 йылланы боюнда  бир де арасын бёлмеген кюйде Бабаюртдагъы 2 номерли школада математика дарсланы муаллими болуп ишлей. Ону загьмат книжкасында бир языв бар. Шо язывгъа гёре, Рамазан Пашаевич 1988-нчи йылда Бабаюртдагъы 2 номерли школада математика дарсланы муаллими болуп белгиленген. Шондан берли тезден экинчи уью болуп битген школада загьмат тёге. Билим берив тармакъгъа да ол озтёрече ёл булан гелген. Айтагъаным, башлап башгъа касбугъа ес болгъан. Сонг буса юреги гиччиден  авагъан муаллим касбуну танглагъан.

Ачыкълашдырып айтгъанда, Рамазан Териков 1961-нчи йылда Къызыл­юрт районну Чонтавул юртунда тувгъан. Ата юртдагъы школада билим алып, Магьачкъала шагьардагъы къурулуш техникумгъа охумагъа тюшген. Орта хас касбу билим береген охув ожакъны уьс­тюнлю кюйде битдирип, ватандаш борчун кютмеге асгерге чакъырылып гетген. 2 йыл асгер борчун кютюп гелгенде, ес болгъан касбусуна гёре ишлемеге сюймеген. Гиччиден муаллим болмагъа сюеген умутлары болгъангъа гёре 1989-нчу йылда Дагъыстан пачалыкъ педагогика институтгъа охума тюшген. Арадан 2 йыл оьтюп, заочно билим береген бёлюкде охувун узата туруп, ол загьмат ёлун башлагъан.  Оьрде эсгерилген йимик, 1988-нчи йылда Бабаюртдагъы 2 номерли школада кёп сюеген муаллим касбусуна гёре ишге къуршала.

Бугюнлерде Рамазан Пашаевич районда математика дарсланы юрютеген лап яхшы муаллимлени ал сыдраларына гирген. Ол республика оьлчевдеги математика дарсланы юрютеген муаллимлени методист бирлешивюню жанлы ортакъчысы да дюр. Ону охувчулары гьар йыл да район ва республика оьлчевде оьтгерилеген олимпиадаларда ва оьзге ярышларда жагьлы кюйде ортакъчылыкъ этген. Гёрмекли уьстюнлюклеге де лайыкълы болуп, школаны ва муаллимини атын оьрге гётерген.

Оьзюню алдында билим алагъан охувчу яшлар да муаллимине уллу гьюрмет ва абур булан янаша. Рамазан Пашаевич гьалиги шартлагъа гёре юрюй. Айтагъаным, оьзюню дарсларында генг кюйде янгы имкалыкълар ва къайдалар булан пайдаланып, яшланы тергевюн тартмагъа ва охувгъа муштарлы этмеге къасткъыла. Янгыз яшлагъа билим берив булан дазуланып къалмай. Район­ оьлчевде оьтгерилеген математика дарсланы муаллимлерини ярышларында биринчи ерлеге ес болагъаны мердешге айланып къалгъан.  Республика оьлчевде оьтгерилеген конкурсларда да районну вакили болуп алдынлы ерлеге лайыкълы болгъан бай сынаву булангъы муаллим.

2006-нчы йылда Рамазан Пашаевич математика дарсланы юрютеген муаллимлени конкурсунда ортакъчылыкъ этип, шо замангъы билим беривню  ва илмуну министри Андрей  Фурсенкону атындан Гьюрметлев грамота булан савгъатлангъан. Шон­да язылгъан кюйде ол «Россия Федерацияны лап да яхшы муаллими» деген ат къазангъан.

– Рамазан Пашаевич бизин школада оьзюню ишине берилген сынавлу муаллим гьисапда танывлу. Ону иш ёлдашларыны, охувчу яшланы ва оланы ата-анасы арасында герти абуру ва сыйы бар. Ол ишине жаваплы янашып, охувчулагъа терен ва мекенли билимлер бермеге къасткъыла. Оьзюню ишин де кёп сюеген ва яшланы юреклерине  «ачгъыч» тапгъан муаллим,–  дей ону гьакъында школаны директоруну заместители Жамиля Гьажигелдиева.

Рамазан Пашаевич Териков билим берив тармакъда тёкген загьматы саялы «Дагъыстан Республикада умуми билим беривню отличниги», олай да «Россия Федерацияны умуми билим беривюню гьюрметли къуллукъчусу деген сыйлы атлагъа да ес болгъан. Ол  – оьр категориялы муаллим.

Рамазан Пашаевич агьлюсю булан 2 улан оьсдюрген. Олагъа тюз тарбия берип, яшав ёллагъа салгъан. Бугюнлерде ону уланларыны бириси Украина бойда юрюлеген хас асгер гьаракатны ортакъчысы гьисапда Ватанны аманлыгъын ва парахатлыгъын­ къоруп сакълай. Рамазан Пашаевич уланларын герти патриот ругьда тарбиялагъан.­

Биз де Рамазан Пашаевич Териковгъа ишинде дагъы да гёрмекли уьстюн—люклеге ва оьрлюклеге етишмекни ёрайбыз. Нечик алай да ону йимик бай сынав топлагъан муаллимлер билим берив тармакъны орта багъанасы болуп токътай.

Бэлла ГЬАЖИГЕЛДИЕВА,

Россияны журналистлени союзуну члени.