Талатгюн, июль айны 30-нда, Дагъыстанны Гьукуматыны Председатели Абдулмуслим Абдулмуслимов Каспийск шагьарда болгъан. Дагъыстанны Премьер-министри оьзюню заместители Муслим Телякъавов, топуракъ ва мал-матагь масъалалагъа къарайгъан министри Завур Эминов, билим беривге ва илмугъа къарайгъан министри Ягьия Бучаев, гьакимлик къурумларыны оьзге жаваплы къуллукъчулары, олай да бизин республиканы парламентини вакиллери булан ювукъда пайдаландырывгъа берилмеге тарыкъ эки школаны биналарыны къурулушунда болуп, бугюнлерде шоларда юрюлюп турагъан ишлени барышына тергев этген.
Инг алда олар Каспийскидеги Къызылюрт орамында ерлешген гележекде бир вакътини ичинде 1224 яш билим алажакъ школаны къурулушуна баргъан. Эсгерилген охув ожакъны къурулушу 2020-нчы йылда башлангъан. Шо гьакъда айта туруп, школаны бинасыны къурулушуна 1 миллиард манатны оьлчевюнде акъча маялар гёрсетилгени гьакъда айрыча эсгермеге тюше.
Уьч къабатлыкъ шо школаны уллу бинасында лифтлер къурашдырылажакъ. Шону булан бирге, жыйынлар ва спорт заллары, ашханасы, китапханасы гьалиги талаплагъа жавап береген кюйде ясандырылажакъ. Шондан къайры да, школада гьар тюрлю чагъындагъы уланлар ва къызлар юзмеге уьйренмеге болар йимик эки уллу бассейн пайдаланывгъа берилежек деп къаравуллана.
Дагъыстанны Гьукуматыны Председатели Абдулмуслим Абдулмуслимов оьтгерген тергевлени вакътисинде буссагьатгъы вакътиде касбучулар школада къолланажакъ техника алатланы, олай да мебельни жыйып турагъаны белгили болгъан. Бизин республиканы Премьер-министри къурувчулар оьзлени ишинде йиберген кемчиликлени гёрсетген. Шону булан бирге, шоланы барысында артгъа салмай тайдырмагъа, школаны бинасын ювукъ вакътини ичинде пайдаландырывгъа беривге байлавлу тийишли чараланы оьтгермеге тюшегени гьакъда айтгъан.
Шондан сонг Дагъыстанны Премьер-министри Каспийск шагьарда Назаровну атындагъы орамда къурулушу юрюлюп турагъан 300 яш билим алажакъ школадагъы ишлени барышына къарамагъа баргъан. Шо школада да яшлагъа охумагъа ва билим алмагъа бары да онгайлыкълар болдурагъан эркин, ярыкъ класлардан къайры да, ашханасы, жыйынлар оьтгерилеген ва спорт заллары, намаз къылагъан айрыча уьйлери болажакъ. Савлугъу осал, сакъат яшлар эркин айланмагъа болар йимик школаны бинасында башгъа бир тюрлю онгайлыкълар да болдурулажакъ.
А. Абдулмуслимов школаны бинасыны къурулушуна гёрсетилген 262 миллион манат заманында бакъдырылгъан буса да, къурувчулар оьзлеге борч этип алгъан ишлени токъташдырылгъан болжалларда кютмейгенине разисизлигин билдирген. Шо гюнгю тергевлени гьасиллерине байлавлу ол оьтгерген генгешде белгили болгъаны йимик, шо школаны бинасы бу йылны ноябр айыны 1-инден артда къалмайгъан кюйде пайдаландырывгъа берилмеге тарыкъ. Бириси школаны бинасы пайда-ландырывгъа август айны 25-нде берилип, ачылывуна байлавлу шатлыкълар сентябр айны 1-де оьтгерилежек деп къаравуллана. Абдулмуслим Абдулмуслимов Дагъыстанны къурулушлагъа ва архитектурагъа къарайгъан министрлигине школаланы къурулушларын толу кюйде тамамлавгъа байлавлу берилген тап-шурувланы яшавгъа чыгъарывгъа тергев этмеге тапшургъан.
Насрулла БАЙБОЛАТОВ.
