Жумагюн, 19-нчу июльда, Буйнакск район администрацияны башчысы Уллубий Ханмурзаев Янгы Къумукъ юртда болуп, янгы асфальт салынма онгарылгъан орамларда яшайгъанлар булан ёлугъув оьтгерген ва юрюлюп турагъан ишлени гьазирлигин тергеген.
– Бу гезик Янгы Къумукъда биринчи саналагъан У.Буйнакскийни ва Парахатлыкъны атындагъы орамларда ярашдырыв-янгыртыв иш юрюлюп тура. Инг алдын орамлар грейдер булан тегиш этилген, сонг бир ягъадан къайыр булан къошулуп увакъ чакъа тёгюлген. Тангала эртенден башлап эсгерилген орамларда 500 метр мезгилге 10 см. къалынлыкъда эки къат этилип асфальт салынма гёз алгъа тутулгъан, – деди У.Ханмурзаев.
Сонгугюн эртен эки де орамда иш къайнар кюйде юрюле башлады. Орамлагъа асфальт салыв булан машгъул «Промдорстрой» деген жамиятны участкасыны начальниги Абдулгьаким Къадивов булан ёлугъуп, юртлулар учун бек тарыкълы да дюр, агьамияты да бар бу ишге нече адам ва техника къуршалгъанны гьакъында лакъыр этемен.
– Грейдер ва экскаватор булан орамланы тюзлеп, тегишлеп чыкъгъан сонг, оланы бою булан камаз машинлер къайыр къатыш чакъа тёге юрюй. Оланы тегишлей туруп, яхшы басылтмакъ муратда уьстюне сув да чачыла, – деп хабарлай Абдулгьаким яйны яллавунда токъталмай юрюлеген ишни гезиги ва барышы гьакъда. — Арты булан 3 каток машинлени гьайдатып, тегишленген орамланы басылта юрюйбюз. Ондан сонг салына уллу бюртюклю чакъа къошулуп ярашдырылгъан асфальт ва яхшы кюйде таптала. Асфальтны экинчи къатлаву да салынгъан сонг рагьатланабыз. Бизин идараны бажарывлу касбучулары тапшурулгъан ишлени оьр даражада, сан янын да сакълап юрютелер.
Гертиден де, бу ишлеге къуршалгъан участканы 13 де къуллукъчусу бир гюнню ичинде бек гьаракат этип У.Буйнакскийни атындагъы орамда 250 метр ерге эки къат асфальт салып чыкъдылар. Артындагъы гюн шо меселде чалышып, олар Парахатлыкъны атындагъы орамдагъы ишлени де сан янлы этип кютдю ва бу орамларда яшайгъанланы баракалла сёзлерине лайыкълы болдулар.
Казим КАЗИМОВ.
СУРАТДА: У.Буйнакскийни орамына асфальт салынагъан вакъти.
