Арбагюн, июль айны 24-нде, «Россияны тарихи – уьстюнлюклени тарихи» деген тарихи патриот форуму оьтгерилди. Бизин уьлкени  тарихи варислигине, аслулар боюнда болуп гетген агьвалатланы агьамиятлыгъына  тергевюн бакъдырмакъ, олай да ватандашланы патриот гьислерин  беклешдирмек муратда «Россия – мени тарихим» деген тарихи  паркында  юрюлген шо гьаракатгъа кёплер къуршалды.

Ачыкълашдырып  айтгъанда,  форумну  ишинде  белгили пачалыкъ ва жамият  чалышывчулар, жамият ва асгер-патриот бирлешивлени вакиллери, маданиятны, илму тармакъны гёрмекли адамлары ортакъчылыгъын болдурду. Оланы арасындан Дагъыстанны милли масъалалагъа ва динлеге байлавлу ишлеге къарайгъан министри Энрик Муслимовну атын  айрыча эсгермеге тюше.

– Бу йыл бизин Дагъыс­тангъа чапгъын этген хал­къара жинаятчылыкъ уьюрлерин дагъытылгъанлы арадан 25 йыл тамамланагъаны белгиленежек. Шо да бизин республиканы ва Россияны тарихинде болуп  гетген инг агьамиятлы агьвалатланы бириси гьисаплана. Шо заман бизде, Дагъыстанда, савлай уьлкени бирлиги сакъланды,– деди оьзюню сёйлевюнде министр.

Шондан  сонг оьтгерилген форумну барышында кёплер чыгъып  сёйледи. Россияны Игити Загьит Загьитовну сёйлевю жыйылгъанланы  айрыча тергевюн тартды. Ол оьзюню сёйлевюнде бюгюнлерде Украина бойда юрюлеген хас асгер гьаракатда бизин якълы уланлар ва къызлар  фашизмни уьюрлерин ёймакъ учун къасткъылып ту­рагъаны гьакъда эсгерди. Шону булан бирге, олар уьс­тюнлюк булан уьйлерине къатажагъына инанагъанын  билдирди.

Росияны халкъларыны Ассамблеясыны ёлбашчысы Зикрула Ильясов, олай да Росияны Игити Нюрмагьаммат Гьажимагьаматовну анасы Сапижат Мазаева да оьзлени  сёйлевлеринде бизин якълы уланлар ва къызлар  Украина бойда игитликни уьлгюлерин гёрсетип турагъаны гьакъда  ташдырды.

Оьтгерилген форумну  ахырын эте туруп, Дагъыстанны халкъ артисткасы Зульфия Ильясова «Мени Ватаным» деген йырны айтды.

 

Б. АЙБОЛАТОВ.