1-нчи июльда дав агьвалатларда ортакъчылыкъ этгенлени гюню белгиленди. Къызылюрт шагьарда асгер борчун кютген ветеранланы «Патриоты» деген советини ортакъчылары афгъанлыланы эделигине салынгъан мемориалны алдында жыйылгъан эдилер.
Запасдагъы подполковник Агьмат Гьюсейнов Ватанны алдындагъы борчун намуслу кюйде кютмек учун къаст этип, олар дав урушларда жанын аямай, душман булангъы ябушувларда ортакъчылыкъ этгенин эсгерип сёйледи.
Оьсюп гелеген яш наслуну патриот ругьда тарбиялавда тюрлю-тюрлю дав агьвалатларда ортакъчылыкъ этгенлени гьаракаты айрыча ер тута. Шогъар байлавлу болуп охув ожакъларда афгъан давну ортакъчылары булангъы ёлугъувлар чакъда-чакъда юрюле.
Биз оьзюню гьакъында лакъыр юрютеген афгъанлыланы эделигине салынгъан мемориал савлай Дагъыстанда белгили. Мунда дав агьвалатларда жанын къурбан этген ватандашлардан 11 жагьил адамны сураты салынгъан. Россияны Игити Нугьутдин Гьажиевни портретине тийип ону онг ягъында юртлум шавхал-янгыюртлу Алхан Къапаровну, сол янында буса бирдагъы къумукъ улан, чонтавуллу Ибайдулла Гьимбатовну сураты ерлешген.
Шо гюн оьтгерилген эсделик чарада ортакъчылыкъ этгенлени арасында Афгъан давну ветеранлары солтанянгыюртлулардан Абдулкъадыр Абукъовну ва Муса Аскерхановну, эндирейли Къанболат Салавовну, чонтавуллу Ибрагьим Темирхановну атларын эсгерме ярай. Хумторкъали районну ветеранларыны Советини председатели Къураш Алиев де Афгъанистанны ветеранлары булан бирге шо гюн юрюлген гьаракатда активлигин гёрсетди.
Эсгерилген гьаракатны ортакъчылары мемориалгъа чечеклер салды ва эсделикге сурат алдырдылар.
Алибек САЛАВАТОВ.
СУРАТДА: гьаракатдан гёрюнюш.
Автор чыгъаргъан сурат.
