- 8-нчи июль–Агьлюню, сюювню, аминликни гюню
2008-нчи йыл Россияны Федерация Советини социал — политикагъа къарайгъан комитетини жыйынында гьар йыл 8-нчи июльда агьлюню, сюювню ва аминликни гюнюн белгилемек деген къарар къабул этилинген.
Озокъда, яшавда нече тюрлю агьлюлер бар. Амма гьар уьягьлюню аманлыгъы, беклиги, татывлугъу ожакъны къургъанлардан гьасил бола. Бир-биревню сююп, гьюрмет этип, аявлап, инанып, рагьмулу кюйде яшамакъ да уллу насип.
Бизде, бырынгъыдан берли агьлю адат-къылыкълар ёрукълу кюйде юрюлюп гелген. Шо буса халкъны культурасына, ич дюньясына, англавларына бек таъсир де этген, агьлюлени ругь байлыгъын гючлендирген. Шону учун да, къайсы девюрде де халкъ арада бир сигьрулу къала йимик къурулгъан, беклешген, ким де сукъланардай асил, оьзден ожакълар аз болмагъан. Шолай мекенли ожакълар бизге къыйынлыкълардан оьтмеге де, гележегибизге инанмагъа да гюч бере.
Артдагъы вакътилерде агьлюню, сюювню, аминликни Бютюнроссия гюнюне айрыча агьамият береген болгъан. 2024-нчю йыл Агьлюню йылы деп токъташдырды Президент В. Путин. Шону да гёз алгъа тутуп, бизин республикада да гьар тюрлю гьаракатлар, ахшамлар, мажлислер, сурат конкурслар, мастер-класлар оьтгериле. Ондан къайры, узакъ йыллар бирче яшап турагъан агьлюлени уьйлерине барып, оланы сыйлы тархы булан къутлап, уллуланы гёнгюн алагъанлыкъ да арив мердешге айлангъан. Бир заманда да мукъаятлы кюйде къурулгъан оьзден ожакълар кемимесин. Жамиятыбызны сав-саламатлыгъы да гёрмекли ожакълардан гьасил экенни унутмайыкъ.
П. ГЬАЙБУЛЛАЕВА.
