Магьачкъала ва Дербент шагьарларда жинаятчыланы дин идаралагъа ва ич ишлени къуллукъчуларына этген савутлу чапгъыны дагъыстанлыланы чы нечик де, савлай элни талчыкъдырды. Жинаятчыланы дини де, миллети де болмай дегени бирдагъы гезик де герти болуп чыкъды. Шолай олар тюрлю-тюрлю динлени юрютеген дагъыстанлыланы арасында эришив, республикабызгъа буса питне салма къарагъанлар.

Россия халкъара террорчулукъгъа ва экстремизмге къаршы хас асгер гьаракатны юрютеген заманда, ичиндегилер жамият-политика гьалны бузма къарайгъаны, шоларда адамлыкъдан болгъан бир зат да ёкъну англата.

Дагъыстанны Башчысы Сергей Меликов оьзюню сёйлевюнде дагъыстанлылагъа кёп гьалек болмай турмакъны тиледи ва адамсызлыкъ, вагьшилик этгенлер тийишлисин алажакъны билдирди. Дагъыс­танны Башчысы хас штабны ортакъчылары булан жыйын оьтгерди ва сав гече ишде турду, гьалны тергевюню тюбюнде сакълады. Артындагъы гюнде шо агьвалатлар болгъан ерлеге де барды ва дин къуллукъчулар булан гьаллашды.

Шо болгъан вагьши ишге кёп пачалыкъланы ёлбашчылары къайгъырышывун билдирди. Ерли гьакимиятлар оьтгерилген митинглерде жинаятчыланы налатлап сёйледи.

Чапгъынны ва сонггъу атышывланы натижасында дин идараланы аман­лыгъынсакълап турагъан 20-дан да артыкъ ич ишлени  къуллукъчулары гечинди, 42 адамгъа зарал болду. 5 жинаятчы дагъытылды, тек болгъан иш минглер булангъы адамланы талчыкъдырды. Артындагъы гюнлерде шо ерлеге гюллер салып, адамлар жанын къурбан этгенлеге сый этди.

Дагъыстанны Халкъ Жыйыныны 35-нчи сессиясында сёйлеген Сергей Меликов террорчулукъ ишге къаршы чаралар толу юрюлмейгенни эсгере туруп, полицияны къуллукъчуларыны игитлиги гьакъда айтды ва савгъатлагъа гёрсетмекни тийишли гёрегенин билдирди.

Къайгъы ва къыйынлыкълар адамланы бирикдирегени герти. Дагъыстанлылар жинаятчыланы налатлады, кёбюсю кёмегин болдурма къарап айландылар. Шону булан бирге, тамашагъа къарама гелегенлер де кёп эди. Шолай гезиклерде ари тайып, ич ишлени къуллукъчуларына четим этмей турма герекли болагъаны ачыкъ.

Дагъыстанны Гьукуматына зарал болгъан агьлюлеге кёмек этмек тапшурулгъан.

 

Гебек КЪОНАКЪБИЕВ.