Владимир ПУТИН:

Бажаргъан озар, бажармагъан чарыгъын тозар деп негьакъ айтылмагъан. Совет девюрден сонг бизин уьлкебизге янгы базар экономиканы шартларында халкъ ва пачалыкъ учун лап да тарыкълы тармакъланы янгыртмагъа тынч болмады. Бузмагъа-тынч, тизмеге къыйын…

Юрюген ёл алыр… деген кюйде, бизин булан дос тюгюл пачалыкъланы янындан айлана якъда билдирилген  къысаслагъа да къарамайлы Россия гьалиги яшавлукъ-экономика оьсюв масъалаланы ёрукълашдырывда гёрмекли натижалагъа етишегени гележек учун инамлыкъны тувдура.

Бу йыл уьч гюнню уза­гъында, дагъы да ачыкъ этип айтгъанда, июн айны 6–8-нчи гюнлеринде юрюлген Петербург халкъара экономика форумуну оьлчевюнде оьтгерилген чараланы гьасиллери де шону ачыкъдан ташдырды.

– Бажарывлулар къыйын­лы шартларда сынала, – деди оьзюню сёйлевюнде Россияны Президенти Владимир Путин, оьтгерилген форумну натижаларыны жамын чыгъара туруп. – Озокъда, янгыз терек бав болмас деген кюйде, савлай аламдан айрылып яшамагъа бажарылмайгъаны да аян. Шону учун Петербург халкъара экономика форумунда ортакъчылыкъ этегенлеге – бизин булан байлавлукъда ишлемеге разилик билдирген пачалыкъланы ва оланы элчилерине, далапчы адамларына ва  компанияларына айрыча разилигимни билдирмеге сюемен. Россиягъа ва ону булан дос аралыкълар юрютеген пачалыкълагъа мал айландырывда, къуллукъларын яшавгъа чыгъарывда четимликлер тувдурагъанлар янгылыш бола. Неге десегиз, артдагъы эки-уьч йылланы ичинде бизин уьлкебизде болдурула­гъан умуми ич продукт­ну ва шолай да тышгъа йиберилеген малланы, къуллукъланы къадары артып тербей. Гележекде де етишилген натижалар булан дазуланмагъа хыял этилинмей, политика-экономика байлавлукълар генглешежеги шекликни тувдурмай.

Белгили болгъаны йимик, Петербург халкъара экономика форумунда 2024-нчю йылда  136 пачалыкъны вакиллери ортакъчылы­гъын болдурду. Оьтгерилген ёлугъувланы, гьакълашывланы, сынав алышдырыв генгешлени оьлчевюнде 1 триллион 237 миллиард манатны оьлчевюнде мал айландырывгъа ва къуллукъланы болдурувгъа байлавлу пачалыкъланы, компанияланы ва далапчы тайпаланы арасында дыгъарлар байланды.

ДР-ни башчыларыны баянына гёре, Форумда ортакъчылыкъ этген дагъыстанлылагъа да оьз имканлыкъларын аян этмеге онгайлы шартлар яратылынгъан. Шо гьакъда ДР-ни Гьукуматыны Председатели Абдулмуслим Абдулмуслимов уьлкебизни маълумат къуралларына берген  хас баянлыкъда да разилик булан  эсгерилди.

«Кавказ. РФ.» деген компанияны башчысы Андрей Юмшанов ва тыш пачалыкъланы вакиллери  бизин республикабызны имканлыкъларына айрыча тергевюн бакъдырды. Сурсат малланы, къой этни, гьюрбечни, дюгюню, сувланы оьзге тюрлю малланы ва къуллукъланы сан янына оьр къыймат берди. Туризмни оьсдюрювде  инвестиция маяларын пайдаландырмагъа разилигин билдирди.

 

Къ. КЪАЗАКЪМУРЗАЕВ.

СУРАТДА: форумну ортакъчылары – дагъыстанлылар.