Алда, айрокъда Совет Союзну заманларында ракдан авруйгъанлар, оьлегенлер нагагь да болмай эди. Гьали буса нечакъы биз сюймесек де, аты арагъа чыкъгъанда ким де къакълыгъып гетеген онкология аврувланы къармагъына тюшгенлер гьар абатда йимик ёлугъагъан болгъан демеге ярай.
Бир-бир гьисап беривлеге гёре, гьар йыл савлай Россияда 150 мингден кёп эргиши, 130 мингден де артыкъ къатын тайпа рак аврувлардан гечине. Ондан къайры да, сабий чагъындан тутуп 17 йыллыкъ чагъына ерли етишген 1 мингге ювукъ яш да оьле.
Шо намарт аврувну артып барагъанын да гёз алгъа тутуп, Дагъыстандагъы «Чистое сердце» деген фонд артдагъы 5-6 йылланы узагъында Тюркиядагъы дюньягъа белгили «Acibadem» деген халкъара клиникалардан бизге гьавайын консультациялар оьтгермеге белгили врачланы, касбучуланы Дагъыстангъа гелтирип туралар.
Шо фондну вакили Жасмина Мирзоева айтгъан кюйде, бу йыл да халкъарада ахтарып, бизде къатынгишилени кёкреклериндеги безлерине рак аврув къабунуп, шондан чинк де кёп авруйгъанланы санаву артып барагъанын гьисапгъа алып, Тюркиядан, оьрде аты эсгерилген халкъара клиникадан тийишли врач-касбучуну чакъыргъан эдилер. Бу ерде бираз англатыв бермеге сюемен.
«Acibadem» деген халкъара медицина сетге 5 пачалыкъда иш гёреген 22 клиника, 19 медицина амбулатория центрлар гире. 2017-нчи йылда буса Истамбулда янгы талаплагъа, технологиялагъа жавап береген «Acibadem Altunizade» деген 442 койкасы булангъы клиника, онкология центр да ачылды. Шонда да нече тюрлю янгы къайдаларда онкология аврувланы бакъмагъа болагъан дюнья оьлчевдеги шартлар яратылгъан.
Алдагъы гюнлерде Истамбулну Уьскюдар деген районунда ерлешген «Acibadem Altunizade» (Ачыбадем Алтунизаде) центрда чалышагъан медицина илмуланы доктору, профессор, айтылынгъан маммолог, онколог, хирург Айкут Сойдер ва онда менеджер болуп иш гёреген Халим Исмайылов гелип гетдилер. Айкут Сойдер бир гюнню узагъына Магьачкъаладагъы «НикАмед» деген медицина-лаборатория центрда 30-гъа ювукъ кёкрек безлеринде рак авруву бар къатынгишилени къабул этип, олагъа тийишли насигьатлар берди, не йимик дарманлар этмеге герекни айтды. Оланы арасында гьаранбалагьгъа чыдап турагъан, бек авур авруйгъанлары да бар эди.
Паху ГЬАЙБУЛАЕВА.
СУРАТДА: Айкут Сойдер аврувланы къабул этеген вакъти.
Автор чыгъаргъан сурат.
