«Бизин къоччакъ уланларыбыз Россияны аманлыгъын сакълай туруп, бек агьамиятлы ва жаваплы борчну къанын-жанын аямайлы кютелер. Оланы макътавгъа лайыкълы ишлери, озокъда, сав элге айтылмагъа да герек. Мен ойлайгъан кюйде, олагъа багъышланып йырлар йырланмагъа да, шиърулар язылмагъа да, эсделик белгилер салынмагъа да тюше. Олар, гертиден де, герти игитлер», – деген Россия Федерацияны Президенти В.В.Путин.
Бугюнлерде Украина бойда 2022-нчи йылны февраль айында башлангъан хас асгер гьаракатда ортакъчылыкъ этеген бизин якълыланы игитликлери савлай уьлкебизге белгили болуп да тура. Тюзюн айтса, оьзлер къуллукъ этип турагъан асгер бёлюк булан дыгъар байлап яда гёнгюллю кюйде ана Ватанны миллетчилерден къоруйбуз деп якълама баргъан гьар-бир ортакъчыны оьзгеленикине ошамайгъан айрыча яшав ёлу да, тамаша къысматы да бар. Нечик болса да, олар дюнья империализмни шыртына бийийген Киевдеги режимни намарт, агъулу урлугъу яйылып гетмесин учун, уьлкебизни якълама чыкъгъанлар.
Шо инсаплы гьаракатгъа къуршалгъан уланлар ва къызлар янгыз Донбасны азатлыгъын ва эркинлигин якълайгъандан къайры да, ер юзюндеги фашизмни уьюрлери болгъан бендеровчуланы намарт хыялларыны алдын алмакъ учун да белсенип иш юрютелер. Олар ата-бабаланы аманатына хыянат болмай, гьалал къуллукъ этеген, ана Ватангъа берген антындан тайышмай чалышагъан, ябушагъан игитлер.
Шолай игит уланларыбызны арасында Украина бойда юрюлюп турагъан хас асгер гьаракатны ортакъчысы, къоччакълыгъы саялы бираз алларда Жуковну медалы булан савгъатлангъан Буйнакск районну Тёбен Жюнгютей юртунда яшайгъан Магьаммат Асадуллаев да (суратда солда) бар. Асгер борчларын кютеген вакътини ичинде Магьаммат оьзюн инг яхшы ягъындан гёрсетме бажаргъан, уьлкебизни Конституциясы булан белгиленген эркинлигин ва харлысызлыгъын якълай туруп, оьзюн къоччакъ кюйде тута, уьлгю гёрсетип чалыша.
Буйнакск районну Атланавул юртундан хас асгер гьаракатгъа биринчи гюнлеринден башлап къуршалгъан сержант Къурбан Алибеков да (суратда онгда) алдагъы гюнлерде гёрсетген къоччакълыгъы саялы гезикли Суворовну медалына лайыкълы болгъан. Ондан алда да Къурбан Жуковну, «Асгер макътавлугъу учун» ва «Ватанны алдындагъы къайратлыгъы саялы» деген 2-нчи даражалы медаллар булан савгъатлангъан.
Озокъда, адамны къоччакъ ишлери, игитликлери янгыз огъар берилеген савгъатлар булан оьлченип къалмай. Чинкдеси, халкъны, элни алдында оьзлени бойнуна алгъан оьр намусну кютюп, тувгъан-оьсген юртуна, агьлюсюне сав-саламат къайтмагъа олагъа ва олар йимик минглер булан башгъалагъа да насип болсун.
Казим КАЗИМОВ.
