Шейит-Ханум АЛИШЕВА

Сен савбол, мактап!

 

Биринчи ёлум –

Билим алмагъа.

Биринчилей къолум

Тийди къаламгъа!

 

Охудум, яздым,

Чечме уьйрендим

Сырын сырланы,

Бирер абат ала

Оьрлендим,

Таныма, билме къырланы.

 

Шо гюнден

Бу гюнге

Яшавум ярыкъ.

Сынама къысматым

Сен эдинг тарыкъ!

 

Бугюн мактабым

Ёлгъа  саласан,

Жаныма сингип

Эсде къаласан!

 

Сен савбол, мактап!

Сен савбол, мактап!

Туражакъман сени

Мюгьлетдей макътап!

 

Дёртлюклер

 

Бир гюн булан яшама

Акъны гёкден айырмай.

Сенден башгъа оьзгеге

Гюн тувмаса къайырмай.

* * *

Къатарбашлар кимге де

Ябушмагъа къатыла.

Бир-бирде чи  терс окълар

Айыпсызгъа атыла.

* * *

Гьакъылы сай адамлар

Айтылына томакъгъа.

Олар бажара янгыз

Къуллукъ этип тамакъгъа.

 

Н. Б.