«Китап – илму булагъы» деп негьакъ айтылмагъан. Биз барыбыз да школа чагъыбыздан тутуп китаплардан таба билимли болгъанбыз. Бизин яшавубузгъа Интернет гиргенде, балики, бир вакъти китап охуйгъанланы санаву тёбенлешген буса да ярай. Тек бугюнлерде оланы санаву артмагъа башлагъан.
Гиччи китапханалары булангъы кафелени, ресторанланы, далаплы адамлар ачып ишлетеген китапханаланы санаву артып бара.
Китапдан таба бизге билмейген, танымайгъан башгъа дюнья, халкълар ва кёп тюрлю къужурлу агьвалатланы билмеге бажарыла. Май айны 27-нде буса Россияда китапханаланы гюнюн оьтгерегени адатгъа айлангъан.
Россияда биринчи китапхана май айны 27-нде 1795-нчи йылда Санкт-Петербург шагьарда ачылгъаны белгили. О заман Император китапхана деп айтыла болгъан.
Озокъда, китапхананы ва китапханада ишлейгенлени гюню китаплагъа абур этеген, охумагъа сюегенлер учун да агьамиятлы.
Дагъыстан республиканы басмаханаларында гьар йыл ерли авторланы китаплары ара бёлмей чыгъа. Китап тюкенлени янгылары ачыла. Китапханаларда да китап охума гелегенлени санаву кемимеген.
Китапхананы гюню Россияда 1995-нчи йылдан берли белгилене. Китапханачылар бизге тарыкълы китапны сайламагъа кёмек эте. Китапланы сан янына, китапханадагъы низамгъа, охувчуланы китаплар булан таъмин этивге олар жаваплы янаша. Янгыз шоларда гьар тюрлю авторланы, халкъланы китапларын тапмагъа, пайдаланмагъа бола.
Тёбен Къазанышда Абусупиян Акаевни атындагъы гимназияны китапханасыны заведующийи Патимат Гьюсеновна Гьажиева охувчу яшланы китаплагъа янашывуну гьакъында булай деди:
– Мен китапханада ишлейгеним 5 йыл бола. Кёбюсю гьалда бизин школада биринчи-алтынчы класланы охувчу яшлары китап охумагъа кёп сюе. Айрокъда 4-нчю класланы яшлары бизин сююндюре. 7-нчи класгъа чыкъгъан сонг китапланы кёп охумагъа сюймей. Яшлар охувунда да шолай бола. Йыл сайын оланы охувгъа иштагьы тёбенлеше. Озокъда, яшлар чебер адабиятны охусун деп къаст этебиз, гьар тюрлю чаралар оьтгеребиз. Гьатта класлагъа гирип къужурлу китапланы башын охуп, ахыры нечик битегенни охуп билмеге таклиф этебиз.
Бизин школа къурулгъанлы, 6 йыл бола. Охутув китаплар гелсе тюгюл, чебер китаплар бизге берилмеген. Оьзюбюзню имканлыкъларыбыз, къастыбыз булан чебер адабиятны да жыйгъанбыз. «Школагъа китап савгъат» деген гьаракатны чакъда-чакъда юрютебиз. Кёплерибизни уьйлерибизде охугъан китаплар бола. Шоланы школаны китапханасына савгъатгъа берсе, охувчулагъа да пайдаланмагъа имканлыкъ бере. Бугюнлерде гимназияны китапханасында гьар тюрлю бёлюклерде китапларыбыз бар. Шолар барысы да охувчу яшланы ата-анасыны ва муаллимлени кёмеклиги булан жыйылгъан. Олагъа гьакъ юрекден баракалла билдиремен. Буйнакск районну билим берив управлениесини ёлбашчысыны заместители Залимхан Татамович Аселдеров май айны башында бизин гимназиягъа оьзюню уьюндеги китапханасын савгъат этди. Охувчулар учун бек уллу савгъат. Огъар да айрыча баракалла билдиребиз.
Мен яшлар булангъы ёлугъувларда китап охумакъны агьамиятлыгъын англатмагъа къаст этемен. Интернет бир заманда да китапланы орнун тутмагъа болмажакъ. Китапны охуйгъан вакътиде хабарны игитлерине жаныбыз авруй. Олар булан бирче сююнебиз, талчыгъабыз, оланы дюньясында оьзюбюзню де гьис этебиз. Охувчулар да мени булан рази бола.
Охув йылны ахырында кёп охуйгъан яшланы грамоталар булан савгъатлайбыз. Яшлар китап охумагъа муштарлы болсун учун гиччиден тутуп ата-анасы да къаст этмеге герек. Гиччипавлар учун да гьар тюрлю суратлар булан безендирилген къужурлу китаплар бар. 5 йылны ичинде амалгъа гелген, топлангъан китап фондубуз гьали гёрмекли болгъан деп айтмагъа ярай. Бу пайдалы мердешлени дагъы да узатажакъбыз.
Патимат БЕКЕЕВА.
