Инчесаниятны гьайран къужурлу дюньясына бир керен чомулгъан адамны оьзюню де гьюнерлери, пагьмулары ачылып-чечилип гетип, шо дюньядан арчылып болмай къалагъанына тамашалыкъ этмеге де тюшмей. Инсанны хасиятларын тергеп турагъан ахтарывчулар ташдырагъангъа гёре, пагьмусуз-гьюнерсиз адам нагагь да болмай. Гьар яшгъа гиччи чагъынданокъ тергев бакъдырып, ону не буса да бир саниятгъа гьасиретлиги барны англап, шогъар имканлыкълар яратмагъа ва оьсдюрмеге тюше.
Шо ягъындан алгъанда Буйнакск районну Янгы Къумукъ юртунда ерлешген инчесаният школасына юрюйген ва тарбияланагъан охувчуланы ашыгъы алча тургъанны гьакъында ташдырып айтма болабыз. Булай мекенли токъташып эсгерегенибизни гертилейген шагьатлар мунда нечакъы сюйсенг де бар. Чинкдеси, Янгы Къумукъдагъы инчесаният школада яшлар булан иш юрютеген муаллимлени оьз касбусуна къарны-гёнгю булан янашагъанлыгъы яхшы натижалагъа етишмеге де имканлыкъ бере.
Инчесаният школаны директору Рабият Шапиевадан башлап, гьар муаллим оьз борчларына яратывчулукъ къайдада, кёп миллетли дагъыстан халкъланы адатларына-мердешлерине, къылыкъ-хасиятларына аркъа таяп, янгы къайдаланы ахтарып ва иш уьстде къоллап чалышалар. Мунда касбусуну терен сырларын билеген бажарывлу тарбиялавчулар чалыша. Оланы гьариси охувчуларыны гьюнерлерини-пагьмуларыны ачылывуна туврадан-тувра болушлукъ эте ва оланы уьстюнлюклеринден къуванып иш юрютелер.
Алдагъы гюнлерде инчесаният школаны охувчулары маданият къалагъа гелген юртлуларыны, ата-аналарыны алдында юрюлген гьисап берив концерт шогъар нече де арив шагьат болуп токътады. Байрам концертни башында школаны охувчу яшлары хор болуп Расул Гьамзатовну сёзлерине гёре язылгъан «Турналар» деген белгили йырны нече де таъсирли этип йырладылар. Бу гьайрангъа сыкълашгъан ва ажайып тавушлары булан белгили халкъ ва авторланы йырларын ерине етишдирип, тынглавчуланы къанына-жанына сингдирип къоягъан хорну коллективине оьз ишин кёп де сюеген, яхшы да билеген Эдилхан Казимов ёлбашчылыкъ эте.
Яшланы пианино сокъма уьйретеген муаллим Гюлнара Алиева ва охувчу къыз Бийке Жаватова Чайковскийни «Юхлайгъан гёзел къыз» деген балетинден вальс бийив къайданы гьайрангъа таъсирли кюйде ойнадылар.
Школаны театр коллективини гьюнерлери чи тезден берли де белгили болуп битген. Яш артистлер оьзлер салгъан «Давну яшлары» деген адабият-музыкалы композициясын шонча да бажарывлу кюйде ойнап гёрсетгенлер чи, бираз алда Мычыгъыш Республиканы тахшагьары Грозныйда оьтгерилген «Пагьмуну алтын тююрлери» деген халкъара конкурсну дипломанты болгъанлар. Яш артистлени сагьнада ойнамагъа оьр категориялы дарс беривчю Любовь Абуева уьйрете.
Дагъыстан Республиканы маданиятыны ат къазангъан къуллукъчусу, инчесаният школаны директору Р. Шапиева яшланы охув йылны яхшы уьстюнлюклер булан тамамлагъаны булан къутлай туруп, оланы атына кёп исси ва лайыкълы сёзлер айтды, ёравлар этди ва жыйылгъанланы къайнар харс урувларыны тюбюнде олагъа грамоталар ва аттестатлар тапшурду.
Гьисап берив концерт шону булан да тамамланып къалмайлы, йырлар, бийивлер, охувчуланы дарс беривчюлер булан бирге айтагъан сарынлары булан узатылды.
Яшланы пагьмулу чыгъышлары шо гюн ата-аналары учун да айрыча сююнчлю савгъат болуп токътады. Школаны охувчулары гележекде оьзлени къысматларын инчесаниятны сигьрулу дюньясы булан байламай къойса да, оланы гьариси генг англавлу, гелишли ва тарбиялы адамлар болуп оьсежегине шеклик этмеге тюшмей.
Казим КАЗИМОВ.
СУРАТДА: байрамны ортакъчылары.
