З. Атаева тувгъанлы 95 йыл бите

Зарипат Атаева 1929-нчу йылда Буйнакск районну Эрпели юртунда тувгъан . Магьачкъаладагъы Дагъыстан педагогика институтну ва  оьр партия школаны битдирген. Оьзюню загьмат чалышывун ол ата юртундагъы школада муаллим касбуну юрютюп башлай. Кёп йыллар оьзге жаваплы къуллукъларда да ишлей. «Къарчыгъа» журналны редактору, Дагъыстанны язывчуларыны союзунда чебер адабиятны пропаганда этеген бёлюкню ёлбашчысы, Къумукъ театр да адабият бёлюкню ёлбашчысы болуп чалышып тургъан. Оьзюню яратывчулугъун ол поэзиядан башлагъан. Сонггъа таба чебер хабарлар, пьесалар язгъан. Къумукъ театрда ону «Сюйген етер муратгъа», «Намус ва такъсыр», «Гюлкъыз», «Васият» деген ва оьзге пьесаларына гёре спектакллер салынгъан.

З.Атаева проза тармакъда чалыша туруп, кёп чебер хабарлар ва повестлер де язгъан. Олар «Авлакъ чечеклер», «Къурдашлар къыйынлы гюн табула», «Шо ёл булан», «Гюнню гёремен» деген  айрыча китаплар болуп да чыкъгъан. Ол 1985-нчи йылдан тутуп, СССР-ни язывчуларыны союзуну члени. Къумукъ театрда ишлей туруп кёп санавда пьесаланы къумукъ тилге гёчюрген ва олар сагьнада ойналгъан. Бу йыл Зарипат Гьажиевна Атаева тувгъанлы токъсан беш йыл тамамлана. Шону гёз алгъа тутуп, ону къысгъа хабарын охувчуланы тергевюне беребиз.

 

Я.БИЙДУЛЛАЕВ.