Изамутдин Алимов Къарабудагъгент районну Аданакъ юртунда тувгъан. Ата юртундагъы школаны битдирген сонг ол армияда къуллукъ этген. 2009-нчу йылда буса Грозный шагьардагъы асгер бёлюк булан дыгъар байлап, мунда къуллукъ этме башлай. Оланы асгер бёлюгю Мычыгъыш Республиканы Наурск станицасында ерлешген.
2022-нчи йыл апрель айда Изамутдин хас асгер гьаракат юрюлеген бойгъа бакъдырыла. Запорожьеде алты ай къуллукъ эте. Сонг ол 2023-нчю йылны декабр айы болгъанча Херсон областда оьзюню борчларын намуслу кюйде кютюп тура. Россиягъа къошулгъан янгы областланы миллетчилерден азат этмек учун къаст этип чалыша. Асгер ёлдашлары булан бирче оланы гьаман чапгъынгъа гелеген бёлюклерин тоза ва янгы-янгы шагьарланы, юртланы халкъын олардан азат эте. Изамутдин Алимов оьзю ва ону ёлдашлары хас асгер гьаракатда гёрсетген къоччакълыкълары учун кёп керенлер медаллар булан савгъатлангъан.
Алдагъы гюнлерде Изамутдин ата юртуна къайтгъан. Дос-къардашларын гёрген сонг Къарабудагъгент районну башчысы Магьмут Амиралиев булан ёлукъгъан.
– «Бизин аслу борчубуз – хас асгер гьаракатда ортакъчылыкъ этегенлени агьлюлери парахат яшасын учун не кёмек тарыкъ буса да этмек, – деген М. Амиралиев И.Алимов булангъы ёлугъувунда. – Администрация шолай кёмекни этмеге гьаман да гьазир. Не тарыкъ буса да, не етишмей буса да тартынмай айтыгъыз. Сизге ва сизин асгер ёлдашларыгъызгъа савлукъ ёрайман. Элигизни якълап, белсенип гьаракат этегенигиз учун сав районну халкъыны атындан баракалла деп айтма сюемен. Уьстюнлюкню алып къайтажагъыгъызгъа инанаман. Сизин гьар мурадыгъыз, умутугъуз яшавгъа чыкъма насип болсун. Бизин яныбыздан болагъан кёмекни де этежекбиз».
Я. БИЙДУЛЛАЕВ.
