7-нчи майда Дослукъну уьюнде «Сурат чыгъарагъан мухбирлер – Уллу Ватан давда» деген выставка оьтгерилди. Дагъыстанны Башчысыны ва Гьукуматыны администрациясыны, Дослукъну уьюню дирекциясыны ва Дагъыстанны маълумат ва печат агентлигини сиптечилиги булан оьтгерилген чарада жаваплы къуллукъчулар, волонтёрлар ва маълумат къуралланы вакиллери ортакъчылыкъ этдилер. Уллу Уьстюнлюкню 79-нчу йылына багъышлангъан выставкада мухбирлер жанын аямай, нечакъы къоркъунчлу экенге де къарамай юрюлеген давну ичнде суратлар алып, шону эсделигин сакълагъанланы ва гележек наслулагъа къоюп гетгенлени бирлеридир.

 

Гертиден де, мухбирлени гьаракаты булан алынгъан ва залланы айланып салынгъан суратларда немислени черивлерин дагъытывда совет солдатлар гёрсетген къоччакълыкъ суратлангъан.

– Давну гёрмеген яшёрюмлер шону гьакъында суратлагъа ва киноленталагъа къарап биле, – деди маълумат къураллагъа баянлыкъ бере туруп, Дагъыстанны маълумат ва печат агентлигини ёлбашчысы Абдуразакъ Жамалутдинов. – Мухбирлеге шо къагьрулу давланы эсделигин суратларда къоймакъ учун ал сыдралагъа чыкъма ва атышывну тюбюнде къалма да тюшген, олар бюдремеген ва бугюнлеге етишдирген. Шоланы арасында, Рейхстаггъа Къызыл байракъ къакъгъанны гьакъында Евгений Халдей чыгъаргъан сурат инг де аслусу деп гьисаплана, шонда фашизмге ахыр точка салынгъаны суратлангъан. Инг де тамашасы, шондагъы уланланы бириси – дагъыстанлы Абдулгьаким Исмайылов. Арадан 50 йыллар гетип, огъар Россияны Игити деген оьр ат берилди.

Выставканы ачылывунда ортакъчылыкъ этген Дослукъну уьюню директору Илгьама Загьирова, Дагъыстандагъы коллежлени ва хас охув ожакъланы советини председатели М.Рагьимова оьзлени оюн айтдылар ва шулай выставкалар яшёрюмлени патриот ругьда тарбиялама кёмек этежегине шеклик этмейгенни билдирди.

Выставка май айны 30-на ерли юрюлежек.

 

Бизин мухбирибиз.