Гетген жумада, республиканы оьзге районларында ва шагьарларында йимик, тереклер орнатывну булкъалары Хумторкъали районда да оьтгерилди. Шолай, тереклер орнатывну булкъасы Уьчгентде де болду. Районну башчысы Айнутдин Зиявутдинов район администрацияны къуллукъчулары, юртлулар булан бирге, ял алагъан парк бар ерни айланасына яйылып оьсеген тереклер орнатдылар.
Юртлулар «Шагьар онгайлыкълар болдурув» деген программаны оьлчевюнде ял алма болагъан паркны гетген йыл ачгъан эди. Парк юртлулар жыйылагъан ва ял алма сюеген ерине айланып да битген. Район администрацияны башчысыны сиптечилиги булан гетген йыл этилген парк бирден-бир арив ва ял алмагъа леззетли болсун учун бу йыл да паркны айланасына тереклер орнатылды.
– Тереклер, яшыллыкъ юртну гёрюнюшюн алышдыра, гьаваны тазалай, юртну бирден-бир безей. Бугюнгю шартларда юртунгну яшыллыкъны ичинде сакълап болсанг, табиатны тазалыгъын болдурувгъа да бек таъсир эте. Терек кёп болгъан чакъы, юртну къатты еллерден сакълай, язда адамлагъа салкъынлыкъ бере, — деди районну башчысы Айнутдин Зиявутдинов.
«Шагьар онгайлыкълар болдурув» деген проектге гёре районну оьзге юртларында да адамлар ял алмагъа болагъан парклар этмеге гёз алгъа тутулгъан.
Жават ЗАКАВОВ
СУРАТДА: район администрациясыны къуллукъчулары Уьчгент юртда паркны айланасына тереклер орната.
