Аптеклердеги дарманланы гьатдан озуп гетген  багьаларына къарап, манг болуп не этегенингни билмей къаласан. Гьалиги заманда алты саны саппа-сав адамлар бармы экен? Хыйлылар дарманларсыз яшамагъа да болмай. Аврувуна гёре шоланы гьар гюн ичегенлер де бар. Кёплер оьзлени аврувларына къыйышагъан дарманланы  къайдан ва  не ерден учуз багьасына  яда енгилликлерден пайдаланып  алмагъа бола экен деп ахтаралар.

 

Россияны савлукъ сакълав министерлиги инфаркт, инсульт болгъан аврувлар учун 31 тюрлю дарманны енгилликлер (льгота) булан пайдаланып алмагъа болагъан списокгъа къошгъан. Даим стационарларда тергевлер булан турагъан инсульт, инфаркт болгъанлар, юрегинде ишемия аврувлары барлар, шунтирование этгенлер енгиллик рецептлеге гёре оьзлеге тарыкълы дарманланы алмагъа ихтияры бар.  Шо списокгъа къанын синген­ этеген, давлениеден, холестеринни тийишли даражада сакълайгъан дарманлар да гирген.

Мисал учун, юрегине шунтирование этген бир-бир аврувлагъа антикоагулянт дарманланы даим къолламагъа тюше. Брилинт таблеткаланы бир пачкасы 5 минг манат. Шо 28 гюнге бола. Шо дарманны ичегенлер енгиллик булан  алмагъа болажакъ.

 

П. ГЬАЙБУЛЛАЕВА.