Бату Тавболатова бютюн оьмюрюн аврувланы савлугъун­ болдурагъан ва авруп гелгенлени сав этеген, дюньяда инг  де асил, герекли касбугъа багъышлагъан. Магьачкъаладагъы 8 номерли школаны яхшы къыйматлагъа битдирген Бату, яшдан берли танглагъан врачны касбусуна ес болмакъ учун аттестатын Магьачкъала шагьардагъы медицина училищеге бере. Эки йылдан училищени битдирип, медсестра касбугъа ес бола. Шо йыл ону  Къарабудагъгент райондагъы Дёргели юртгъа медсест­раны къуллугъуна ишге йибере.

 

1969-нчы йылда Бату Магьачкъалагъа къайта ва мунда яшланы поликлиникасында ишлей. Поликлиникада ишлей туруп, Дагъыстан пачалыкъ медицина институтну лечебный факультетине охума тюше. 1978-нчи йылда институтдан сонг Каспийск шагьардагъы больницада интернатураны курсларын битдире.

Бату Тавболатова оьзюн­ гёрсетме сююп айлангъан адам тюгюл. Къайда ишлесе де, институтда алгъан билимлерин яшавда пайдаландырмагъа ба­жаргъан. Аврувланы  разилигин алмагъа къаст этген.

– Хумторкъали район ачылгъан вакътиден тутуп, бугюнге ерли Къоркъмаскъаладагъы район больницада, башлап терапевт болуп, больницаны баш врачыны заместители, стационар бёлюгюню заведую-щийини ишин юрютюп тураман. Касбу даражамны, билимлеримни камиллешдирип аврувланы да багъаман. Больницаны стационар бёлюгюню заведующийи болуп ишлейгеним кёп йыллар бола, – дей Бату Тавболатова.

– Бату Арасланалиевна, врачны касбусун тангламакъны себеби не­ден эди? Сизин уьйде врач­гъа охугъанлар бармы?

– Школада охуйгъан йылларымдан тутуп да, медицинагъа охума бармагъа гьасирет эдим. Бизин уьйде менден алда да, гьали де врачны ишин сайлагъан гиши ёкъ. Муна врач касбуну танглагъаным 55 йыл бола. Бютюн оьмюрюмню багъышлагъан­ман деп айтсам да ярай.

Элли беш йыл аз заман тюгюл. Шо йылланы ичинде Бату нечесе аврувланы сав этген, нечелерини рази­лигин алгъан.

– Сиз ойлашагъан кюйде, врачда не хасиятлар болма герек?

– Биринчилей, врачда адамлыкъ хасият болма тарыкъ. Адамлыкъ оьзге касбуланы юрютегенлеге де тарыкъ боладыр. Авруп, санына къыйын болуп турагъан адамгъа жанынг аврумай, арив сёйлеп гёнгюн алма къарамай бусанг, ондан не врач бола?! Аврувлар ятагъан бёлюкню заведующийи бусам да, ятгъан аврувланы уьстюне эртен де, ахшам да гирмеге, оланы гьалын-кююн сорамагъа заман тапмагъа къаст этемен.

– Больницада нече адамгъа ятагъан ерлер бар?

– Аврувлар гечеси-гюню булан ятагъан 15 ер, гюндюз гелип ятып гетегенлер учун да 10 ер, 15 койка яшланы бёлюгюнде де бар.

– Бату Арсланалиевна, аврувланы дарманлар булан таъмин этив нечикдир? 

– Бизде аврувлагъа тарыкъ болагъан дарманлардан кемчилик ёкъ.

Бату Тавболатова 55 йыл врачны ишин намусу булан кютюп юрютген заманны ичинде врачны къыйынлы, тек бек тарыкълы касбусун танг­лагъанына бир мюгьлетге де гьёкюнчлю болмагъан. Кёп керенлер Хумторкъали район администрацияны, Дагъыстанны савлукъ сакълав министерлигини янындан гьюрметлев грамоталар булан да савгъатлангъан. Огъар «Савлукъ сакълавну отличниги» деген белги де берилген. Ону савгъатларыны арасында лап да уллу савгъат – аврувланы разилигин алмакъ.

 

Жават ЗАКАВОВ. 

СУРАТДА: Бату Тавболатова.