Алдагъы гюн РИА «Дагъыстан» деген маълумат агентлигинде Дагъыстанны загьмат ва социал якъдан оьсювню министри Мурат Къазиев журналистлер булан гезикли прес-конференция оьтгерди. Министр гиришив сёзюнде, оьтгерме гёз алгъа тутгъан загьматгъа къуршавну Бютюнроссия ярмакюсю не къайдада юрюлежекни гьакъында англатды.
– Адамланы загьматгъа къуршавну Бютюнроссия ярмакюню биринчи регион тирети «Работа России. Время возможностей» деген баш булан апрель айны 5-де ва 12-нде болажакъ. Бу йыл шо агьамиятлы гьаракатны дазуларын генглешдирип эркин кюйде оьтгерме хыялыбыз бар. Айтагъаным, бу ярмакю янгыз Магьачкъалада тюгюл, Дагъыстанны 13 шагьарында ва республиканы районларында юрюлежек. Ма-гьачкъалада ва Каспийскиде яшайгъанлар учун апрель айны 5-нде «Россия–моя история» деген тарихи паркда сагьат 1-де, апрель айны 12-де буса сагьат 2-де «Время перемен» деген кафеде болажакъ.
Бу агьвалат эки къайдада оьтгерилежек. Федерал оьлчевдеги ярмакю июн айны 28-де оьтгерилежек. Бютюнроссия ярмакю бир вакътини ичинде савлай гьукуматыбызны бар да ерлеринде юрюлежек. Шонда уллу компаниялар, идаралар ортакъчылыкъ этежек. Иш излейгенлеге шо компанияланы есилери булан ёлукъма, лакъыр юрютмеге имканлыкълар яратылажакъ. Бу гьаракатны ортакъчылары не йимик идараларда, компанияларда бош иш ерлер барны билежеклер. Шо гюн компанияланы есилери иш излейгенлер булан лакъырлашывлар оьтгерип, янгыз оьзлер турагъан ерлерде тюгюл, ондан тышда да бир-бир бош иш ерлеге къуршалма болажакъ. Шонда ортакъчылыкъ этмеге сюегенлер оьзлеге ювукъдагъы загьматгъа къуршайгъан центрлагъа яда «Работа России» деген порталда арза бермеге тарыкъ.
Ярмакюде иш излейгенлерден башгъа, школада оьр класларда охуйгъанлар, студентлер яда оланы ата-аналары ортакъчылыкъ этмеге де бола. Дагъыстанда биринчи гезигинде 10 минг адам ортакъчылыкъ этежек. Ери гелгенде эсгермеге сюемен, гетген йылгъы ярмакюню натижасында биз 700 адамны ишлеге салма болдукъ, – деди министр.
Прес-конференцияны ахырында ол журналистлени соравларына да жаваплар берди.
П. ГЬАЙБУЛЛАЕВА.
