Йылны инг де агьамиятлы агьвалаты гьисапланагъан Россияны Президентин сайлавлар тамамланды. 15-17-нчи мартда юрюлген сайлавлар кёп арив оьтдю.

 

Дагъыстанны сайлав комиссиясы билдиреген кюйде, сайлавланы къурумлу оьтгермек учун 54 территория ва 1862 сайлав участка ишлеген.  Списокларда язылгъан 1 708 189 сайлавчудан 1 547 370  адам тавуш берген, шо буса 90,5 процент бола.

Тавушлар шулай пайлангъан:

Путин Владимир Владимирович – 1 425 408 тавуш (92,12%);

Харитонов Николай Михайлович – 79 902 тавуш (5,16%);

Слуцкий Леонид Эдуардович – 23 681 тавуш (1,53%);

Даванков Владислав Андреевич  – 10 284 тавуш (0,66%).

Сайлавлар районларда нечик оьтгерилгенни гьакъында бизин мухбирлерибизни макъалаларында бериле.

 

Хасавюрт район

 

Дагъыстанны инг де кёп адам яшайгъан Хасавюрт районунда да Россияны Президентин сайлав байрамча оьтгерилди. Къайсы сайлав участкагъа барсанг, музыка-йыр булан къаршылай эди. Эндирейдеги 1561 участкада тавуш берип битгенлер, маданият къаланы ал бетиндеги  агъачкъомуз согъагъан яшлагъа къарай туруп, шайлы заман гетмей эдилер. Сайдулла Дадаев уьйретеген яшлар бырынгъы къумукъ кюйлени бек яхшы согъуп бажаралар.

 

Яхсайда 7200 сайлавчу бар, шолар 4 участкагъа пайлангъан. Юрт башчысы Арслан Исмайылов айтагъан кюйде, тавуш берме байрамгъа йимик гелгенлер. Шоланы арасында коллективлер, хас асгер гьаракат ортакъчылыкъ этегенлени агьлюлери, афгъан давну ветеранлары гюп-гюп болуп гелип тавуш бергенлер.

Хасавюрт районда сайлавлагъа гьисапгъа алынгъан списокдан 95 процентден де артыкъ адам гелген ва Владимир Путинге 93709 адам тавуш берген.

 

Къарабудагъгент район

 

Районда сайлавлар уллу байрам йимик оьтген. Районну территория сайлав комиссиясыны ёлбашчысы Наж­мулгьуда Гьасанов билдирген кюйде, тавуш бермек учун участкалагъа сайлавчуланы 95 проценти гелген.

 

Владимир Путинге  95,5 проценти тавуш берген, къалгъан кандидатлар 3 процентден бираз артыкъ тавуш алгъан. Районну башчысы Магьмут Амиралиев сайлавчулагъа баракалла билдирген.

– Бизин район оьзлени бирлигин гёрсетди ва Дагъыстанда инг де актив кюйде ортакъчылыкъ  этди, — дей Магьмут Амиралиев. – Сайлавлагъа коллективлер, тамазалар, агьлюлер, хас асгер гьаракатны ортакъчылары, оланы агьлюлери гелип оьзлени ватандашлыкъ борчун кютдюлер. Сайлавлар къавгъасыз оьтдю, шону юрюшюнде районгъа Дагъыстанны Халкъ Жыйыныны депутатлары Магьаммат Магьамматов, Далгьат Залбеков, маълумат ва печат агентликни ёлбашчысы Абдуразакъ Жамалутдинов да гелдилер.

Гьар мюгьлетде ерли ва рес­публика маълумат къурумларда сайлавлар юрюлеген кюйню гьакъында язылып чыгъып да тургъан.

 

Хумторкъали район

 

Сайлавланы экинчи гюнюнде ахшам Уьчгентде районну башчысы Зиявутдин Айнутдиновну кёмеги булан уллу ифтар этилди, шонда бирликни, дослукъну, парахатлыкъны эсгерип дуалар этилген.

 

Районну сайлав комиссиясыны председатели Темирлан  Арсланбеков билдирген кюйде, сайлавлагъа гелген 15682 адамдан В.Путинге — 15098 тавуш берген, Н.Харитонов – 329, Л.Слуцкий  — 186 ва В.Даванков – 69 тавуш алгъан.

 

Къаягент район

 

Районну ватандашларыны бирлери сайлав участкалагъа савлай агьлюлери булан гелгенлер. Оланы умуми санаву 90 процентге етише. Эсли наслу гьаманда йимик айрыча гьаракатын гёрсетген.

 

Шо агьамиятлы агьвалатда биринчилей ортакъчылыкъ этегенлер де бар эди.

Оланы бириси – Янгы Къаягентде турагъан Рустам Магьамматов. Алдындагъы гюн ол ювукъ адамларыны ва къурдашларыны арасында 18-йыл битгенин белгилеген. Сайлавлар башлангъанда Конституция оьзюне береген ихтияр булан пайдалангъан. Районну башчысы Магьаммат Элдарханов Рустамны айрыча къутлагъан ва жагьил адамгъа хас дипломну тапшургъан.

 

Бабаюрт район

 

Россияны Президентин сайлавлар Бабаюрт районда да къурумлу оьтдю.

 

Сайлавланы биринчи гюнюнден башлап да сайлавчулар уьягьлюлери булан гелеген гезиклер алдан эсе кёп болгъаны билинди. Байрамгъа йимик, сайлав участкалагъа гьатта гиччи яшларын да алып гелегенлер бар эди. Шолай Адил Янгыюртдагъы 0135 номерли сайлав участкалагъа районну башчысы Даниял Исламов да савлай уьягьлюсю булан гелди.

Сонг да, хас асгер гьаракатны ортакъчылары, оланы ата-аналары, кёп яшлы аналар, уллу чагъына етгенлер ва районну белгили адамлары сайлавлагъа оьзлер чи нечик де гелдилер, оьзгелени де ватандаш борчун кютмеге чакъырдылар. Гьакъы­къатда сайлавлагъа ватандашланы кёплери къуршалдылар, оьзлени ва авлетлерини гележеги учун тавуш да бердилер.

Сайлавчуланы Конституция  ихтиярларын ва законлукъну болдурувгъа сайлав участкаларда уьч гюнню боюнда жамият тергевчюлер де оьзлени ишин  юрютдю. Гьакъыкъатда районну бир юртунда да законну бузагъан гезиклер гьисапгъа алынмады.

Сайлавланы гьасиллерине гёре, бабаюртлу сайлавчуланы 92 процентден де артыгъы оьзлени тавушун Россияны Президенти Путинге бергенлер. Шо буса В.В.Путинге Бабаюрт районлулар теренден инанагъанын ва оьзлени ювукъ гележегин ону булан байлайгъанын бирдагъы да исбатлай.

 

Буйнакск район

 

Россияны Президентин сайлавланы бу йыл март айны 15 – 17-синде оьтгерме гёз алгъа тутулгъан эди. Шу янгы къайда кёп санавдагъы сайлавчулар учун гертиден де ­онгайлы болгъанын эсгермеге тюше.

 

Арив онгарылгъан сайлав участкаланы алдында тавуш берме гелегенлени Буйнакск районну маданият къуллукъчулары къурч макъамлар, йырлар, милли бийивлер булан къаршылай.

Дагъыстан Республиканы Башчысы С. Меликовну тапшурувуна гёре республиканы билим берив ва илму министри Ягьия Бучаев шо гюнлени ичинде Буйнакск райондагъы сайлав участкаланы барысында да дегенлей болду.

Сайлавланы биринчи гюнюнде ол Буйнакск районну башчысы Уллубий Ханмурзаев, ДР-ни МВД-синде ахтарыв ишлени юрютеген Управлениени начальниги Магьамматнаби Адилханов булан бирге сайлав участкаланы аманлыкъ болдурулгъан ва тарыкъ-герек алатлар булан таъмин этилген кюйлерин тергеп, рази къалдылар.

Сайлавланы экинчи ва уьчюнчю гюнлери де  районну юртларында шат макъамлар согъулуп, йырлар айтылып, къурч бийивлер булан узатылды. Кёбюсю адамлар сайлав участкалагъа тангалабыз инамлы болсун учун тавуш бермеге савлай агьлюлери булан да байрамгъа йимик геле эдилер. Районда лап уллу саналагъан Тёбен Къазаныш юртдагъы  участкада сайлавлар айрыча жанлы ва хош кюйде юрюлдю. Мунда районну маданият къуллукъчулары булан бирликде яшланы инчесаният школасында тарбия­ланагъанлар да оьзлени пагьмуларын, гьюнерлерин гёрсетип турдулар.

Сайлавчулар булан гьакълаша туруп, районну башчысы У. Ханмурзаев эсгерген кюйде, уьлкебизни гележек яшаву гьар ватандашны тавуш беривюнден гьасил.

«Бугюн сайлав участкалагъа жыйы­лып гелип, бир ягъадан тавуш берегенигизни гёргенде, сююнмей болмайсан. Гьаман да йимик, Буйнакск районну ватандашлары  оьз­лени сыкълашып болагъанлыгъын, биригип иш юрютегенлигин бирдагъы керен де тасдыкъ этелер» деп, сайлавланы барышына разилигин билдирди министр Ягьия Бучаев де.

Уьч де гюнню ичинде Магьачкъаладан гелген вакиллер райондагъы юртланы кёбюсюнде болуп, сайлавчулар ва тергев юрютегенлер булан ёлугъувлар оьтгерип, гьакълашып, гьаллашып дегенлей, рази къалгъанын эсгердилер.

 

Магьачкъала

 

Темиркъазыкъ Кавказ федерал округунда Дагъыстан оьзюнде  лап да кёп халкъ яшайгъан инг де уллу республика гьисапда танывлу. Семендер де лап да уллу шагьар посёлок санала. Мунда яшайгъанланы умуми санаву 10 мингден кёп болгъан ва йылдан-йылгъа артып тура. Оланы 2500-ге ювугъу сайлавларда тавуш бермеге гьисапгъа алынгъан.

 

РФ-ни Президентин сайлавлар оьтгерилеген участка комиссия 58 номерли школада ерлешген эди. Сайлавлар да республикабызны оьзге муниципал къуру-лувларында йимик къурумлу кюйде оьтдю.

– Сайлавларда тавуш берегенлени 90 процентден къолайы ортакъчылыкъ этдилер, – деди  1035 номерли сайлав участканы председатели Зумурут Къайырбекова. Оланы авадан пайы 50-60 оьмюрюндеги адамлар. 80 йылдан ­оьмюрю оьтгенлер де 450-ге ювукъ сайлавчубуз бар. Олардан биз уьйлерине барып тавуш алдыкъ. Лап да уллусу Айшат Ибрагьимова ва оьзгелери гележекде бирлик, парахатлыкъ ва харлысызлыкъ болсун учун лайыкълы кандидатгъа тавуш бережеги гьакъда разилик булан эсгердилер.

Гертиден де, арада бирлик болса, къалгъан масъалаланы яшавгъа чыгъармагъа рагьат да болур. Бирикген эл озар.

 

Бетни гьазирлеген

Г. КЪОНАКЪБИЕВ, А. АЛИЕВ,

Г. ГЬАЖИЕВ, К. КАЗИМОВ,

Къ. КЪАРАЕВ.