Гьар тюрлю къурумлар яда оьзге хас идаралар, министерликлер болсун, гьар йылны башында гетген йыл этген ишлерини, гьаракатларыны жамын чыгъарагъанлыкъ адатгъа айланын къалгъан. Алдагъы гюнлерде аврувлагъа алгъасавлукъда кёмек болдурагъан республика клиника больницасы 2023-нчю йылда оьзлени яшавгъа чыгъаргъан ишлерини, борчларыны гьасиллерине байлавлу генгеш оьтгерди.
Шо жыйында Дагъыстанны савлукъ сакълав министрини заместителлери Ярослав Глазов ва Патхула Патхулаев де ортакъчылыкъ этдилер. Оьрде эсгерилген больницаны баш врачы Магьаммат Иманалиев гетген йыл оьтгерген чакъы ишлени гёзден гечирип, гьаракаты гьакъда доклад этди.
Ол белгилеген кюйде, гетген йыл бу больницада 6 минг 852 операция оьтгергенлер. Шо буса 2022-нчи йылдан эсе, 10 процентге артыкъ. Шо йылны ичинде стационарны шартларында 14 минг аврувгъа медицина кёмек этилген.
– Оьр технологияланы къоллайгъан, аврувлар учун шоланы пайдаландырагъан гезиклер де артгъан. Сонг да, оьтген йыл къыйынлы аврувлагъа ОМС-ну дазуларында оьр санлы медицина кёмек болдурув программагъа гёре 1347 операция этилди. Юрек-къантамурлагъа, нейрохирургиягъа, абдоминальный хирургиягъа байлавлу оьр технологияланы нечик къоллама герекни гьакъындагъы методикаланы уьйренив уьстюнлю кюйде юрюлюп тура, – деп билдирди баш врач.
Магьаммат Иманалиев оьзюню докладында эсгерген кюйде, юрекни къысылгъан къантамурларын генглешдирмек (стентирование) учун 1039 адамгъа операция этилген. Олай да, хапарсыздан эсден тайып, йыгъылып къалагъанлар учун хирургияны гючю булан аврувну багъагъан кюйлерин де къолламагъа башлагъанлар.
Жыйынны ахырында Дагъыстанны савлукъ сакълав министерлигинден гелгенлер «Скорая помош» республика клиника больницасыны гьаракатына оьр багьа берип сеслендилер.
П. ГЬАЙБУЛЛАЕВА.
